Алексей Песошин: Коррупциягә каршы эшчәнлектә яшьләр катнашсын өчен яңа формалар табарга кирәк
Коррупциягә каршы эшчәнлектә яшьләр катнашсын өчен яңа формалар табарга кирәк. Бу хакта ТР Премьер-министры Алексей Песошин Халыкара коррупциягә каршы көрәш көненә багышланган Республика коррупциягә каршы яшьләр форумында хәбәр итте. Бу чара Казанның “ИТ-парк” мәйданчыгында узды.
ТР Хөкүмәте башлыгы сүзләренчә, коррупция икътисадка, көндәшлеккә сәләтлелеккә, сәяси тотрыклылыкка, илнең иҗтимагый куркынычсызлыгына тискәре йогынты ясый.
“Шуңа коррупция факторларын киметү өчен барлык чараларны кабул итү бик мөһим”,- дип ассызыклады Алексей Песошин.
Ул билгеләгәнчә, бу юнәлештәге эштә мөһим роль яшь буынга карый.
“Коррупциягә каршы сәясәттә иҗтимагый яшьләр оешмалары катнашуны киңәйтү мөһим. Бүгенге форумның максаты – коррупция фактларын киметүгә юнәлдерелгән тәкъдимнәр әзерләү. Бу эштә яшьләр катнашсын өчен яңа формалар табарга кирәк”, - дип йомгаклады ТР Премьер-министры.
Быел Республика коррупциягә каршы яшьләр форумы бишенче тапкыр уздырыла. Форумда барлыгы 250 кеше катнаша: ТР дәүләт хакимияте органнары җитәкчеләре, ТР Дәүләт Советы депутатлары, югары уку йортлары җитәкчеләре һәм укытучылары, бизнес-структура вәкилләре, шулай ук төрле иҗтимагый яшьләр оешмалары вәкилләре.