Татарстанда “Смарт-Сити Казан” иярчен-шәһәр проекты гамәлгә ашырылачак

5 июль 2012 ел., пәнҗешәмбе
Татарстанда “Смарт-Сити Казан” иярчен-шәһәр проекты гамәлгә ашырылачак. Ул “Казан” халыкара аэропорты янәшәсендә 350 гектар мәйданда урнашачак. Бүген ТР Президенты Рөстәм Миңнехановның Малайзия консорциумы (AMANAH Capital Group, Straits Consulting Engineers компаниясе), Берләшкән Гарәп Әмирлекләренең эре конгломераты (TECOM Investments компаниясе) һәм Siemens компаниясе вәкилләре белән очрашуы вакытында проектны гамәлгә ашыруның техник һәм финанс мәсьәләләре каралды.
Рөстәм Миңнеханов әлеге проектның яңа эш урыннарын булдыру, процесска башка илләрдә smart city проектларында катнашу тәҗрибәсе булган кече һәм урта бизнес компанияләрен җәлеп итү, Татарстанның инвестицияләр җәлеп итү сәләтен күтәрү, “акыллы” технологияләр кертү ягыннан республика өчен кызыклы булуын искәртте.
Проектның генераль планын эшләүдә төп җаваплылык “Малайзиянең Эй Джи Плэнинг анд Урбан Дизайн Груп” компаниясендә. “Татинвестгражданпроект” ААҖ – генераль план буенча техник партнер. “Смарт Сити Казан” проектын инфраструктура һәм энергия саклау технологияләре белән тәэмин итүдә Siemens компаниясе тәҗрибәсен файдаланырга җыеналар.
Проектны булдыру һәм аның белән идарәдә финанс консультанты ролендә Россия һәм халыкара эре финанс институтлары булачак.
Билгеле булганча, быелгы KAZANINVEST халыкара форумы кысаларында ТР Инвестицион үсеш агентлыгы “Смарт Сити Казан” проектын презентацияләгән иде инде. Иярчен-шәһәр Татарстанның яңа эшлекле үзәгенә әйләнергә, эре халыкара компанияләрне, шулай ук Россия һәм Татарстан компанияләрен җәлеп итәргә тиеш. Шул рәвешле, Казан халыкара дәрәҗәдәге заманча инфраструктурага ия булачак. Ул күргәзмәләр һәм конференцияләр үзәген, административ үзәкне, белем бирү, сәламәтлек саклау зоналарын һәм югары технологияләе производстволарны үз эченә алачак.
Экспорт, иминият һәм финанс компанияләре, бизнес-хезмәтләр аутсорсингы үзәкләре, фәнни һәм тикшеренү үзәкләре, дәүләт оешмалары “Смарт Сити Казан”ның потенциаль резидентлары булачак. Иярчен-шәһәр аша “Казан” халыкара аэропортын шәһәр үзәге белән тоташтыручы аэпроэкспрессның тимер юл тармагы узачак.
Бүгенге очрашуда билгеләп үтелгәнчә, “Смарт Сити Казан” территориясендә бизнес алып бару өчен аерым шартлар тудырылачак (“бер тәрәзә” принцибы, салым ташламалары, инженерлык инфраструктурасына ялгануда ташламалар һ.б.).
ЯҢАЛЫКЛАРГА ЯЗЫЛУ
Сайттагы барлык материаллар лицензия буенча тәкъдим ителә:
Creative Commons Attribution 4.0 International
Яндекс цитирования