Илдар Халиков "КАМАЗ" ГАҖ директорлар советының чираттагы утырышында катнашты

Мәскәүдә "Ростех" дәүләт корпорациясе генераль директоры Сергей Чемезов рәислегендә "КАМАЗ" ГАҖ директорлар советының чираттагы утырышы узды.

Бу чарада Татарстан Республикасы Премьер-министры, "КАМАЗ" директорлар советының кадрлар һәм бүләкләүләр комитеты рәисе Илдар Халиков катнашты. 

Утырыш барышында компания эшчәнлегенә кагылган мәсьәләләр каралды.

Директорлар советында  "КАМАЗ" җәмгыятенең 2016 елда  бизнес-планы үтәлеше буенча беренче нәтиҗәләр хәбәр ителде.

"2016 елдагы эш нәтиҗәләре буенча "КАМАЗ" бизнес-планны арттырып үтәде, 34,4 мең йөк машинасы сатты, бу 2015 ел белән чагыштырганда 16%ка күбрәк. Шул ук вакытта 28, 2 мең автомобиль эчке базар аша сатылды, 6,2 меңе экспортка куелды. Керем 127,28 млрд. сумга артты, 2015 ел белән чагыштырганда 31%ка югарырак", – дип билгеләде Сергей Чемезов.

Утырыштан соң Сергей Чемезов һәм Директорлар советының башка әгъзалары “КАМАЗ-мастер” командасы вәкилләре – “Дакар-2017” раллиенда җиңүчеләр белән очраштылар.