Быел көзге чакырылыштан башлап, хезмәткә китүче егетләр банк картасы аша акча алачак

Быел көзге чакырылыштан башлап, 1 елга хезмәткә китүче Татарстан егетләренә, хәрби хезмәткә китүче сумкасы һәм кесә телефонына өстәп, банк картасы да биреләчәк. Гомумән, “ВТБ-24” банкы картасы бөтен Россия буенча хәрбиләрдә кулланылышта булачак, димәк, һәрбер хәрби частьта аның банкоматлары торачак. Әлеге банк карталарына рядовойлар хисабына аена 400 сум, сержантларга 500 сум акча салыначак. Банк карталары 5-10 көндә әзерләнә, шуңа күрә, республиканың муниципаль берәмлекләрендәге хәрби комиссариат бүлекләрендә хезмәткә алынасыларның исемлекләрен үз вакытында төзеп җибәрү буенча эш бара. Банк вәкилләре белән килешүләр исә Татарстанның “хәрби капкасында” – Җыю пунктында (Сборный пункт) төзелә. Шул рәвешле, хәрбиләр белән барлык исәп-хисап үзәкләштереп башкарыла.

Бүген бу хакта ТР Хөкүмәте йортында республика муниципаль берәмлекләре белән видеоконференция режимында үткәрелгән брифингта ТР хәрби комиссары Сергей Погодин игълан итте.