Рөстәм Миңнеханов түгәрәк өстәл артында нефтьчеләр һәм галимнәр белән очрашты

Бүген Татарстан Фәннәр академиясендә республика Президенты Рөстәм Миңнеханов рәислегендә “Татнефть” ААҖ һәм кече нефть компанияләре чыганакларында нефть чыгаруда инновацион технологияләр кертү мәсьәләләренә багышланган түгәрәк өстәл узды.

Очрашуда “Татнефть” ААҖ генераль директоры Шәфәгать Тәһаутдинов, аның урынбасарлары, ТР Фәннәр академиясе президенты Әхмәт Мәзһаров, Татарстанның кече нефть компанияләре һәм фәнни оешмалары вәкилләре катнашты.

Чара башланыр алдыннан анда катнашучылар Татарстан белгечләренең эшләнмәләре урын алган күргәзмә-презентация белән танышты. “Татнефть” экспозициясе инновацион компаниянең колачы хакында күзалларга мөмкинлек бирде. Кайбер эшләнмәләр Рөстәм Миңнеханов һәм Шәфәгать Тәһаутдиновның игътибарын аеруча нык җәлеп итте, алар Казан белгечләренең тәкъдимнәрен җентекләп тикшерергә күрсәтмә бирде.

“Күргәзмәдә күргәннәрдән чыгып, фән нефтьчеләрне борчыган проблемаларны хәл итүгә ныклап кереште дип әйтергә мөмкин, - диде Рөстәм Миңнеханов, утырышны ачып. – Иң уңышлы идеяләрне Татарстанда гамәлгә кертү аларның башка төбәкләрдә дә кулланылыш табачагына ышаныч тудыра. Без исә, үз чиратыбызда, ярдәм кулы сузарга әзер”.

“Татнефть” ААҖнең баш геологы Рәис Хисамов үз докладында Татарстан галимнәренең идеяләре кулланылыш табарга мөмкин булган эшчәнлек юнәлешләренә тукталды. ТатНИПИнефть (“Татнефть”нең фәнни бүлекчәсе) НИИнефтепромхим һәм Казан федераль институты белән актив хезмәттәшлек итә инде.

"Татнефть" үз алдына нефть чыгаруны ирешелгән дәрәҗәдә саклау бурычын куйды, моның өчен катлаулы технологияләр кулланырга туры килә. Аларның бәясен киметү буенча идеяләр кирәк, диде баш геолог.

“Татнефть” ААҖ генераль директорының беренче урынбасары, баш инженер Наил Ибраһимов үз чыгышын нефть чыгаруның нәтиҗәлелеген арттыру буенча инновацион техник алымнарга багышлады. Ул шулай ук Татарстан фәне потенциалын ихтимал куллану нокталарына да тукталды.

«Нефтеконсорциум» ЯАҖ директоры Фәнис Вәлиев узган елгы түгәрәк өстәл карарлары һәм ТР Президенты күрсәтмәләренең үтәлеше турында хисап тотты. ТР Президенты консультанты Ренат Мөслимов билгеләп үткәнчә, узган елгы түгәрәк өстәл карарлары фәнни эшчәнлекне җанландырып җибәргән.

Рөстәм Миңнеханов, фикер алышуга нәтиҗә ясап, “без фәннән башка көнәшлеккә сәләтле була алмаячакбыз, кайбер юнәлешләр буенча инде алда да барабыз”, дип ассызыклады. Ул мондый түгәрәк өстәлләргә читтән дә галимнәр чакырырга тәкъдим итте. Бүгенге очрашу нәтиҗәләре буенча доклад әзерләнәчәк һәм тиешле күрсәтмәләр биреләчәк.