Рөстәм Миңнеханов республика югары уку йортлары ректорлары белән очрашты

Бүген республика Президенты Рөстәм Миңнеханов югары уку йортлары ректорлары белән узып баручы 2011 ел нәтиҗәләре һәм киләчәккә планнар хакында фикер алышты. Очрашу ТР Хөкүмәте йортында узды.

Очрашуны ачып, Р.Миңнеханов 2011 елда Татарстанның югары мәктәбендә төрле вакыйгалар узуын, тулаем алганда ТР вузларының уңышлы үсеш кичерүен билгеләп үтте. “Бездә яхшы белем бирү потенциалы, чын мәгънәсендә талантлы яшьләребез бар”, - дип ассызыклады Татарстан Президенты һәм вуз җитәкчеләрен студентлар белән активрак хезмәттәшлек итәргә чакырды.

Республика Ректорлар советы рәисе – Казан федераль университеты ректоры Илшат Гафуров Татарстан Президентына югары уку йортында алып барыла торган эшләр хакында хәбәр итте. Аерым алганда, И.Гафуровның сүзләренә караганда, хәзерге вакытта студентлар телевидениесен ачу һәм республикада студентлар спорт фестивален үткәрү хакында сөйләшүләр бара.

Очрашуда шулай ук А.Н.Туполев исемендәге Казан милли тикшеренү техник университеты һәм Казан дәүләт энергетика университетының яңа җитәкчеләре – Николай Абруков һәм Эдвард Абдуллаҗанов тәкъдим ителде. Рөстәм Миңнеханов аларга киләсе елда уңышлар теләде.