Рөстәм Миңнеханов һәм Минтимер Шәймиев Зөя шәһәр утравында яшәүче халыкны Яңа ел белән тәбрикләде

Бүген ТР Президенты Рөстәм Миңнеханов һәм ТР Дәүләт Киңәшчесе Минтимер Шәймиев Зөя шәһәр утравында булды. Алар утрауда яшәүче халыкны Яңа ел белән тәбрикләде. Гороховлар гаиләсен исә яңа торакка күченүләре белән котлады.

Зөя шәһәр утравында яшәүчеләр олы кунакларны Яңа ел чыршысы янында каршы алды. Чыршы утрауның Раштуа мәйданында урнаштырылган.

“Быел Зөя шәһәр утравында күп әйберләр эшләнде, - диде Рөстәм Миңнеханов. – Күп кенә объектлар төзекләндерелде. Утрау яшәү өчен уңайлырак хәзер. Яңа йортлар барлыкка килә. Димәк, республика үсешен дәвам итә, икътисадыбыз социаль мәсьәләләрне хәл итәргә мөмкинлек бирә, дигән сүз. Без үзебезнең тарихи, рухи кыйммәтләребезне онытмыйбыз. Гражданнарыбызның лаеклы шартларда яшәве безнең өчен бик мөһим”.

ТР Президенты шулай ук ТР тарих һәм мәдәният һәйкәлләрен торгызу Республика фонды һәм аның җитәкчесе Минтимер Шәймиевка да рәхмәтен җиткерде. “Фондның һәм Татарстандагы башка структураларның уртак эшчәнлеге нәтиҗәсендә Болгар белән Зөя шәһәр утравын торгыза алдык. Бу республика горурлыгы гына түгел – бу бөтен Россиянең горурлыгы”, - дип билгеләп үтте Р.Миңнеханов.

Минтимер Шәймиев, утрауда яшәүче халыкка мөрәҗәгать итеп, булган үзгәрешләр турында сөйләде. “Быел республикада иң зур күләмдә торак файдалануга тапшырыла. Программа тормышка ашырыла”, - диде ул.

Минтимер Шәймиев шулай ук утрау халкын Яңа ел белән тәбрикләде.

Рөстәм Миңнеханов һәм Минтимер Шәймиев Зөя шәһәр утравында яшәүче балаларга Яңа ел бүләкләрен тапшырды.

Шуннан соң кунаклар Гороховлар гаиләсенә яңа фатирдан ачкыч бүләк итте. Утрауда быел 33 фатирлык 8 йорт төзелгән. Декабрьдә 5 йорт кулланылышка тапшырылган. 2012 елның гыйнварында калган 3 йорт тапшырылачак.

Исегезгә төшерәбез: Зөя шәһәр утравында яшәүче 91 гаилә торак шартларын яхшыртасы иде. 2010-2011 елларда 81 гаилә яңа фатирларга күченә алды.

Гороховлар гражданнарны аварияле хәлдәге торактан күчерү программасында катнашты. Гаилә башлыгы Геннадий Горохов 1981 елдан бирле Зөя коррекцион мәктәп-интернатта сакчы булып эшләде. Бүген ул күгәрченнәр үрчетү белән шөгыльләнә. Аның тормыш иптәше Вера Горохова Зөя мәктәбендә инглиз теле укытучысы булып эшли. Уллары Сергей Казан дәүләт кооператив техникумында белем ала.

Чарада шулай ук ТР Президентының социаль мәсьәләләр буенча ярдәмчесе Татьяна Ларионова, Яшел Үзән муниципаль районы башлыгы Сергей Батин һәм башка рәсми затлар катнашты.