Илдар Халиков "ПОЗИС" ААҖндә булды

Россиядә суыткычлар җитештерү буенча әйдәп баручы предприятиеләрнең берсе булган “ПОЗИС” ААҖ лидерлык позицияләрен тагын да ныгытырга омтылырга тиеш. Бүген предприятиедә булган ТР Президенты вазифаларын башкаручы-Премьер-министр Илдар Халиков шулай дип белдерде.

“ПОЗИС” ААҖ бүгенге көндә Россиянең суыткычлар базарының 10 процент өлешен алып тора һәм көнкүреш, медицина техникасын җитештерү буенча Россиядә, чит илләрдә иң эре җитештерүчеләрдән санала. 2011 елда предприятие 2,6 млрд сумнан артык суммага 276 мең берәмлеккә якын суыту техникасы саткан. Аерым алганда, “ПОЗИС” медицина өлкәсендәге суыткычлар белән тәэмин итү буенча ТР Сәламәтлек саклау министрлыгының заказын үтәгән. Компания суыткычларны шәхси бренды белән җитештерүдән тыш, тиешенчә үз производстволары булмаган эре чит ил компанияләре заказларын да үти. Әлеге модельләрне дә “ПОЗИС” конструкторлары эшли.

“ПОЗИС” бүген “Ростехнологияләр” дәүләт корпорациясе составына керә һәм биредәге башка компанияләр, шулай ук Татарстан компанияләре белән тыгыз хезмәттәшлек итә. Мәсәлән, суыткычларны эчке бизәкләү өчен кирәкле полимер материалларны ул “Казанорсинтез” һәм “Түбән Кама нефтехим”нан ала. Ә предприятиедәге яңа бер модель өчен идарәнең электрон блогын эшләү белән Яшел Үзәндәге кечерәк бер фирманың шөгыльләнүе билгеле.

Бүгенге сәфәре барышында Илдар Халиков предприятие генераль директоры Радик Хәсәнов белән бергә суыткычлар җитештерү цехын карап, производствоның тулы чылбыры белән танышты. Илдар Халиковка шулай ук завод продукциясеннән күргәзмә тәкъдим ителде. ТР Премьер-министры журналистлар белән булган әңгәмәсендә, предприятиенең казанышларын югары бәяләде. Аның белдерүенчә, “ПОЗИС” маркасы Татарстанда, тулаем, Россиядә дә дистәләрчә еллар дәвамында расланган ышанычлылык гарантиясе булып тора. “Заводта бүген җитештерүнең тулы циклы үзләштерелүе мөһим”, -дип ассызыклады ул. Илдар Халиков сүзләренә караганда, завод үсештә, анда ай саен производствога яңа модельләр кертелә, продукциянең киң гаммасы тәэмин ителә.

“Лидерлык позицияләрен тагын да ныгыту өчен, алга таба да чишелешләр табу мөһим. Дөнья лидерлары, шул исәптән, көндәшләр белән дә хезмәттәшлек итү зарур. Бүген биредә бу юнәлештә алып барылган эш дәвам итәр дип ышанам”, -ди Премьер-министр. Илдар Халиков бүген предприятиедә күргәннәре предприятиедәге, биредә эшләүчеләр тормышындагы тотрыклылыкны күрсәтә, дигән фикердә.