ТР Президенты “Спорт тапшырулары” коммерцияле булмаган автоном оешмасы генераль директоры белән очрашты

Бүген Татарстан Республикасы Президенты Рөстәм Миңнеханов “Спорт тапшырулары” коммерцияле булмаган автоном оешмасы генераль директоры Василий Кикнадзе белән очрашты.

ТР Хөкүмәте йортында узган очрашуда ТР яшьләр эшләре, спорт һәм туристлык министры Рафис Борһанов, ТР төзелеш, архитектура һәм торак-коммуналь хуҗалык министры Ирек Фәйзуллин, “2013 елда Казанда узачак XXVII Бөтендөнья җәйге универсиадасы башкарма дирекциясе” коммерцияле булмаган автоном оешмасы директоры Владимир Леонов, Республика матбугат һәм гаммәви коммуникацияләр агентлыгы җитәкчесе Марат Моратов, “Татарстан – Яңа гасыр” ААҖ генераль директоры Илшат Әминов катнашты.

Очрашуда 2013 елда Казанда узачак XXVII Бөтендөнья җәйге универсиадасына әзерлек һәм аны үткәрү кысаларында алдагы хезмәттәшлек хакында сүз барды, дип хәбәр итә ТР Президентының матбугат хезмәте. Аерым алганда, халыкара тапшырулар алып бару үзәге булдыру өчен техник таләпләр, 2013 елгы Универсиада объектларының телевизион инфраструктурасын әзерләү һәм башка мәсьәләләр хакында фикер алышынды.

Искәртеп узабыз, “Спорт тапшырулары” коммерцияле булмаган автоном оешмасы 2010 елның ноябрендә Халыкара студентлар спорты федерациясе башкарма комитеты тарафыннан 2013 елгы җәйге Универсиада ярышларын төп трансляцияләүче итеп расланды. 2011 елның маенда “Казан 2013” Башкарма дирекциясе” һәм “Спорт тапшырулары” коммерцияле булмаган автоном оешмалары арасында Россия Федерациясе территориясендә трансляция алып бару хокукын тапшыру турындагы килешүгә кул куелды.

XXVII Бөтендөнья җәйге универсиадасы барышында Казанда ярышларның трансляциясен оештыру күздә тотыла. ТВ-трансляцияләрне тәэмин итү өчен белгечләр җәлеп итү, күчмә телевизион станцияләрне эшкә җигү ниятләнә.