Татарстан Урман хуҗалыгы буенча федераль агентлык белән килешү имзалады

Бүген Казан Кремлендә Татарстан белән Урман хуҗалыгы буенча федераль агентлык арасында хезмәттәшлек Килешүенә кул куелды. Документны ТР Президенты Рөстәм Миңнеханов һәм агентлык башлыгы Виктор Масляков имзалады. Килешү урманнарны нәтиҗәле файдалану буенча уртак чаралар уздыруны күздә тота.

Кремльдәге очрашу вакытында Виктор Масляков республикада урман хуҗалыгы үсеше дәрәҗәсенә соклануын җиткерде. “Россиянең шушындый төбәкләре булуы шатландыра. Республикада урман хуҗалыгының бай тарихы булу аңлашыла, шулай да бу уңышлар бүген хезмәт куючыларның зур тырышлыгы нәтиҗәсе дә”, - дип искәртте ул.

Рөстәм Миңнеханов үз чиратында урманга сакчыл караш булдыруның мөһимлеген ассызыклады. Президент Урман хуҗалыгы федераль агентлыгы җитәкчелегенең бу өлкәдә уңай үзгәрешләргә юл ачуын югары бәяләде. “Сезнең команда модернизация алып килде. Бүген урман хуҗалыгына яңа технологияләр килде”, дип Рөстәм Миңнеханов бүген Саба районында ачылачак урман селекциясе-орлыкчылык буенча яңа үзәкне мисалга китерде.

Татарстан башлыгы федераль агентлыкның урманнарны саклау мәсьәләсенә булган игътибарын аерым билгеләп үтте. “Федераль агентлык белән бергә гамәлгә ашырыла торган чаралар Татарстан урманнарының иминлеген тәэмин итәргә булыша”, - ди ул.