Рөстәм Миңнеханов Мәскәү өлкәсе Хөкүмәт йорты архитектурасы белән танышты

Бүген Татарстан Республикасы Президенты Рөстәм Миңнеханов Мәскәү өлкәсе Красногорск шәһәре Хөкүмәт йортын карады. Мәскәү өлкәсе губернаторы Борис Громов заманча биек комплекс буенча экскурсия үткәрде.

Искәртеп узабыз, бүген Рөстәм Миңнеханов җитәкчелегендәге Татарстан Республикасы делегациясе Мәскәү өлкәсендә эш визитында. Визит максатларының берсе – Татарстан Республикасы Хөкүмәте белән Мәскәү өлкәсе Хөкүмәте арасында сәүдә-икътисади, фәнни-техник һәм социаль-мәдәни хезмәттәшлек турындагы килешүне имзалау.

Мәскәү өлкәсе Хөкүмәте йорты урнашкан комплекс 3 ел төзелгән. Комплекс рәсми рәвештә 2007 елның октябрендә ачылган. 3 мең дәүләт хезмәткәре өчен билгеләнгән комплекснын мәйданы 86 мең кв. метр тирәсе. Биредә 8 азык-төлек блогы, 500 урынга билгеләнгән ашханә, конференция залы, кабул итү заллары, 1,2 мең тамашачыга исәпләнгән киноконцерт залы, матбугат үзәге, берничә кафе һ.б. урнашкан. Комплекс составына төрле катлы булган берничә корылма кергән, иң озыны – 90 метр. Иң биек катта Мәскәү өлкәсе губернаторы Борис Громовның эш бүлмәсе урнашккан.

Татарстан Республикасы делегациясе әгъзаларына комплексның архитектурасы турында сөйләделәр. Татарстан Президенты Рөстәм Миңнеханов комплексны күреп соклануын белдерде. Аның сүзләренә караганда, ул бу комплекс турында күп ишеткән, мөгаен, бу илдәге иң яхшы объектларның берседер. “Без республикада күп төзелеш эшләре алып барабыз, әмма бездә мондый объект юк”, - диде Рөстәм Миңнеханов.