Рөстәм Миңнеханов Брянскида терлекчелек өлкәсенең ит тармагын үстерүгә багышланган киңәшмәдә катнашты

Бүген Россия Федерациясе Хөкүмәт Рәисе Дмитрий Медведев Россиядә терлекчелек өлкәсенең ит тармагын үстерүгә багышланган күчмә киңәшмә үткәрде. Анда Татарстан Республикасы Президенты Рөстәм Миңнеханов та катнашты.

Киңәшмәдә катнашучылар Брянскиның мөгезле эре терлек үрчетү фермасында булды. “Котляково” фермасы әйдәп баручы агрохолдингларның берсе “Мираторг” составына керә. Брянски өлкәсендә “Мираторг” Россиядә югары сыйфатлы сыер ите җитештерү буенча инвестицион проектны гамәлгә куя.

Дмитрий Медведевка “Мираторг” файдалана торган авыл хуҗалыгы техникаларын тәкъдим иттеләр. Медведев “Котляково” фермасы һәм гомумән, холдинг эшчәнлеге белән танышкач эре агрокомплекслар булдыруның перспективаларын бәяләде. Россия базарында сыер итенә булган ихтыяҗны тулысынча канәгатьләндерү өчен шундый 10 комплекс кирәк дип белдерде РФ Хөкүмәт Рәисе. Киләчәктә эшләр болай яхшы барса, Россия сыер итен экспортка чыгара алачак, дип ассызыклады ул.

Россия Хөкүмәте җитәкчесенә шулай ук ветеринар контроле пунктын, “Мираторг” агрохолдингында файдаланыла торган транспорт мониторингы системасын тәкъдим иттеләр.