Татарстан Премьер-министры Илдар Халиков АТЭС киңәшмәсендә чыгыш ясады

Бүген Казанда “Азия-Тын океан икътисади хезмәттәшлеге” (“Азиатско-тихоокеанское экономическое сотрудничество” - АТЭС) форумында РФ авыл хуҗалыгы министры Николай Федоров һәм ТР Премьер-министры Илдар Халиков сәламләү сүзе белән чыкты.

Россия Федерациясе Хөкүмәте исеменнән сәламләп, Н.Федоров, безнең икътисадаларыбыз заманчалыкның дорфа басымына дучар була, арада азык-төлек куркынычсызлыгын тәэмин итү мәсьәләсе иң кискеннәрдән санала, ягъни бу - яшәү һәм үлем мәсьәләсе, дип билгеләп үтте. Тотрыклы азык-төлек куркынычсызлыгын тәэмин итүнең ышанычлы механизмнарын табуда халыкның күпчелеге һәм дөнья сәнәгате туры килгән АТЭС икътисадларының аерым җаваплылыктагы институты кирәк, дип, министр бүгенге очрашуны шушы мәсьәләдә һәм төбәктә авыл хуҗалыгының бүгенге торышына бәя бирү, аның үсеше перспективалары өчен уникаль мөмкинлек буларак атады. Мондый мөмкинлек һәм әйбәт шартлар тудырган Татарстан Республикасы җитәкчелегенә ихлас рәхмәт сүзләре җиткереп, Н.Федоров Казан каласы, Казан Кремле буйлап оештырылган экскурсияләр, мәдәни программаның истә кала торганлыгына да игътибар итте.

ТР Премьер-министры Илдар Халиков исә мөхтәрәм җәмәгатьне Татарстан Президенты Рөстәм Миңнеханов, республика Хөкүмәте һәм шәхсән үз исеменнән сәламләде. Татарстан Россия Федерациясенең динамик үсештә булган һәм илнең үзәгендәге мөһим сәүдә артерияләре кисешкән җирдә урнашкан төбәкләренең берсе, дип билгеләп үтте. Татарстанда “Алабуга” махсус икътисади зонасы, “Химград” технополисы, индустриаль һәм технопарклар комплекслары, бизнес-инкубаторлар һәм башка шундый бизнес үсеше стимуллаштырыла торган гаять зур һәм күптөрле инфраструктура формалашкан. 2011 ел нәтиҗәләре буенча, Татарстанның тулаем төбәк продукты 40 млрд. АКШ доллары тәшкил итте, авыл хуҗалыгы продукциясе күләме – 5 млрд. АКШ долларыннан артык; уртача климатик шартларда республикада 5 млн.тонна ашлык җыеп алына, 2 млн. тоннадан күбрәк шикәр чөгендере үстерелә, диде ул.

Бүгенге очрашу исә азык-төлек куркынычсызлыгын тәэмин итүдә этәргеч булачак, Россия Федерациясе белән АТЭС икътисадлары арасындагы икътисади элемтәләрне киңәйтүгә ярдәм итәчәк, дип ышаныч белдерде И.Халиков һәм кунакларга меңьеллык Казанда уңышлы эшчәнлек теләде.