Дмитрий Медведев "Иннополис-Казан" шәһәре төзелешенә старт бирде

Бүген Россия Премьер-министры Дмитрий Медведев, РФ Элемтә һәм массакүләм коммуникацияләр министры Николай Никифоров һәм ТР Президенты Рөстәм Миңнеханов IT-паркның беренче бинасы – булачак “Иннополис Казан” территориаль-махсус инновацияле үзәге нигезенә, яшь буынга юллама белән капсула салу тантанасында катнашты.
“Бүген һава торышы яхшылардан булмаса да, көн искиткеч, - дип,башлады сүзен ил Хөкүмәте башлыгы. – Мин барыгызны да Татарстан һәм тулаем алганда ил үсеше тарихында яңа бит ачылуы белән тәбриклим. Бүген без яңа проектка старт бирәбез. Әлегә биредә нәрсә булачагын күз алдына китерүе кыен, әмма мин берничә елдан монда яңа шәһәр калкып чыгу шаһитләре булырбыз һәм анда төбәкне, илне һәм үз тормышын үзгәртергә теләгән кешеләр яшәр дип ышанам”.
Дмитрий Медведев биредә күпсанлы кешеләргә иҗади потенциалын тормышка ашырырга ярдәм итәчәк күркәм инновацияле үзәк төзеләчәгенә өметен баглады.
“Әлеге иннополисны төзүчеләр һәм яшәүчеләре дә сез булырсыз”, - дип мөрәҗәгать итте РФ Хөкүмәте башлыгы чарада катнашучы студентларга. “Әлегә монда бушлык, әмма тырышсагыз, барысы да барып чыгар”, - дип төгәлләде ул чыгышын.
Рөстәм Миңнеханов бу вакыйганы Татарстан өчен генә түгел, Россия өчен дә тарихи дип атады. “Монда иннополис төзелеше – безнең өчен зур горурлык. Бездә тәҗрибә дә, IT-кластер да, талантлы яшьләр һәм уңышка омтылучанлык та бар һәм без аларны тагын да камилләштерәбез”, - дип ассызыклады Президент.
Чыгышлардан соң мактаулы кунаклар кулларына төзелеш бияләйләре киеп, махсус кораллар алып, капсула салуга кереште, башта аның эченә Дмитрий Медведев яшь буынга юллама белән флеш-карта салды.

Бу юлламада түбәндәге юллар бар: “Бу вакыйга Татарстан өчен генә түгел, ә ил күләмендә әһәмиятле. Без ышанабыз, иннополис төзелеше мәгълүмати технологияләр өлкәсендә эшләүче Россия компанияләре үсешенә җитди этәргеч бирәчәк. Иннополиста яшәүче яшьләр үзләренең иң кыю идеяләрен тормышка ашыру өчен искиткеч мөмкинлеккә ия булачак, ә биредә тудырылган шартлар бүгенге көндә үк чикләре булмаган мәгълүмати технологияләрнең глобаль базарында күрелмәгән үрләрне яуларга йогынты ясаячак... Без сезгә, Россиягә, көчле һәм куәтле державага ышаныч баглыйбыз”.
Казанның инновацияле шәһәр-иярчене Татарстанның Югары Ослан районында калкып чыгачак. “Иннополис Казан” проектының мастер-планын эшләүне "RSP-Architects" сингапур компаниясе башлыгы – архитектор Лиу Тай Кер җитәкли. Инженер тикшеренүләрен “Казан Гипронииавиапром” ЯАҖ алып бара.
1200 га мәйдандагы территориядә берничә дистә мең IT-белгечләрне, аларның гаилә әгъзаларын һәм хезмәт күрсәтүче персоналны кертеп, 150 меңгә якын кеше эшли һәм яши алачак. Алар өчен барлык кирәкле инфраструктурасы – балалар бакчасы, мәктәпләре, музее, мәдәният йорты, кибетләре, медицина үзәге, күңел ачу учреждениеләре IT-университеты һәм паркы булган торак комплекс сафка бастырылачак.
Төзелешнең беренче чираты 2012-2014 нче елларга билгеләнгән.