Илдар Халиков: “КФУ дөнья компанияләре белән якын партнерлыкның яхшы үрнәген күрсәтә”

Бүген Казан (Идел буе) федераль университетында “Казанда “Samsung” инновацияләр фестивале” –электроника җитештерү һәм мәгълүмати технологияләр эшләү өлкәсендә алдынгы дөнья компанияләренең берсенең өр-яңа эшләнмәләреннән күргәзмә-презентация ачылды.
Чараның ачылу тантанасында ТР Премьер-министры Илдар Халиков, “Самсунг Электроникс Рус Компани” компаниясенең вице-президенты Джей Сул Ю, Премьер-министр урынбасары – ТР мәгълүматлаштыру һәм элемтә министры Роман Шәйхетдинов, Татарстан мәгариф һәм фән министры Альберт Гыйльметдинов, КФУ ректоры Илшат Гафуров катнашты.
“Samsung” компниясе инновацияләр фестивален, Казаннан тыш, Россиянең 6 шәһәрендә уздыра – бу Новосибирск, Ростов на Дону, Екатеринбург, Түбән Новгород һәм Санкт-Петербург. Бүгенге тантанада игълан ителгәнчә, Татарстан башкаласы бу исемлектә дүртенче шәһәр булды. Моңа бәйле рәвештә ТР Премьер-министры көлеп кенә Казан дүртенче түгел, беренче генә була ала дип билгеләп үтте.
Фестиваль кысаларында университет укытучылары, студентлары һәм аспирантлары өчен компаниянең продукциясен һәм IT-технологияләрен
тәкъдир итү булды, шулай ук “Самсунг Электроникс Рус Компании” һәм КФУ арасында үзара аңлашу турында ( фән һәм инновацион эшчәнлек өлкәсендә хезмәттәшлек турында) Меморандумга кул куелды.
“Казан федераль университеты Татарстанның югары уку йортларына дөнья компанияләре белән якын партнерлыкның яхшы үрнәген күрсәтә. Югары уку йорты – студентларны укыта, аларга диплом бирә, ә соңыннан алар белән саубуллаша торган ниндидер структура дигән стереотиптан арынырга кирәк. Без ТР югары уку йортларының Россия, Татарстан, дөньяның эре җитештерүчеләре белән багланышта торган тагын да ныграк фәнни үзәкләргә әйләнүен күрәбез. Бүгенге вакыйга – шуңа ачык мисал”, - диде фестиваль ачылышы тантанасында чыгыш ясаганда Илдар Халиков.