ТР Президенты түрәләргә “Халык контроле” системасына килгән мөрәҗәгатьләр буенча хисап тотарга тәкъдим итте

Татарстанның муниципаль берәмлек җитәкчеләре һәм республика министрлыклары вәкилләре ай саен “Халык контроле” системасына килгән шикаятьләрне һәм аларны хәл итү юлларын белдерергә тиеш. Бүген Татарстан Президенты Рөстәм Миңнеханов шундый боерык бирде.
Бүген ТР Министрлар Кабинетында узган киңәшмәдә вице-премьер – ТР мәгълүматлаштыру һәм элемтә министры Роман Шәйхетдиновның “Халык контроле” системасы турындагы доклады буенча фикер алыштылар.
Докладчы республикада заявкалар һәм шикаятьләр калдыру мөмкинлеге бирүче сервис 2 ай эшли дип искәртте. 2 айда татарстанлылар теге яки бу проблема турында хәбәр итү мөмкинлеген меңнән артык файдаланган.
Шикаятьләрнең күбесе республиканың эре шәһәрләренә туры килә. Аларның 80 проценты Казанга кагыла.
ТР Премьер-министры урынбасары белдергәнчә, мөрәҗәгатьләрнең 30 проценты начар юлларга кагыла, 14 проценты - территорияләрне төзекләндерүгә, 12 процент – юл хәрәкәтен оештыруга.
Республиканың бөтен муниципаль берәмлекләре дә гражданнар мөрәҗәгатьләрен эшкәртергә керешмәгән дип борчылуын белдерде министр. “Гражданнарга нинди булса да җавап бирергә кирәк, алар мөрәҗәгатьләре игътибарсыз калмавын күрергә тиеш”, - дип билгеләп үтте ул.
“Бу кирәкле эш”, - дип шәрехләде Татарстан Президенты. “Мәсьәләләр төрле – кайберләрен бик тиз хәл итү зарур, кайберләре вакыт таләп итә. Әмма теләсә нинди очракта кешеләр мәгълүмат алырга тиеш, - дип белдерде Рөстәм Миңнеханов. – Гражданнарга мәсьәләнең ничек хәл ителәчәге турында аңлату зарур”. Шулай итеп ТР Президенты түрәләргә “Халык контроле” системасы буенча айлык хисап бирү формасын уйларга йөкләде.