ТР Президентына яңа төр "ашыгыч ярдәм" автомобильләрен тәкъдим иттеләр

Бүген Татарстан Президенты Рөстәм Миңнехановка яңа ашыгыч медицина ярдәме автомобильләре презентацияләнде. Әйдәп баручы Россия компанияләре вәкилләренең яңа машина вариантлары белән таныштыру чарасында шулай ук ТР Сәламәтлек саклау министры Айрат Фәррахов катнашты.
Әйтергә кирәк, автомобильләр имгәнүләр, инсульт, миокард инфаркты һәм башка гадәттән тыш хәлләрдә ашыгыч медицина ярдәме күрсәтү өчен кулланылучы заманча медицина җайланмалары белән җиһазланган.
Volkswagen, Ford Transit и «УАЗ» автомобильләре базасында барлыгы 12 яңа “ашыгыч ярдәм” машинасы тәкъдим ителде, Рөстәм Миңнехановка һәркайсының өстенлекләре турында аңлатма бирелде. Алар Түбән Новгород, Ульяновски шәһәрләрендә җыела. Биредә шулай ук хәзер Казанда кулланылышта булучы “FIAT” ашыгыч ярдәм автомобиле дә күрсәтелде, 3 ел эчендә ул шактый таушалырга өлгергән. Айрат Фәррахов әйтүенчә, аның спидометрында 248 мең километр күрсәтә, димәк ул көненә 250 ләп километр юл узган дигән сүз. Бүген презентациядә аңлашылганча, әлеге автомобильләрне җыючы Алабуга шәһәрендәге “Sollers” компаниясе якындагы ике ай эчендә Ford Transit автомобильләренең медицина өчен җайлаштырылган вариантын чыгарырга ниятли. Татарстан Президенты да нәкъ менә Ford Transit ка өстенлек бирде. Volkswagen автомобильләренең базасын Алманиядән кайтару заруриятен исәпкә алганда, Айрат Фәррахов журналистларга шәрехләп узганча, ул кыйбатракка төшәчәк. “Без мөмкин кадәр түбәнрәк бәягә максималь югары сыйфатлы машиналар сатып алуны күздә тотабыз”, - дип белдерде министр.
Айрат Фәррахов Рөстәм Миңнехановка хәбәр иткәнчә, хәзерге вакытта республикада ашыгыч медицина ярдәме машиналары паркын 130 автомобильгә яңарту ихтыяҗы бар. Бу проблема аеруча районнарда кискен. Президент авыллар өчен “УАЗ” медицина автомобильләрен сатып алу мәсьәләсен йөкләде. Ә Казан өчен Универсиадага әзерлек кысаларында Ford Transit автомобильләре кайтарылачак. Яңа ашыгыч медицина автомобильләре өчен республика казнасыннан 220 миллион сум акча бүлеп бирелгән.
Айрат Фәррахов журналистларга биргән интервьюсында билгеләп узганча, бүгенге көндә Татарстанда 380 ләп ашыгыч медицина ярдәме бригадасы тәүлек буе эшли. 3 ел элек республика өчен 160 автомобиль кайтарылган булган, бүгенге көндә хезмәт итү вакыты 5 елдан узган машиналар 150 гә җиткән. “Ашыгыч ярдәм машиналары паркы һәрвакыт югары сыйфатта булсын өчен, аны ел саен аны яңартып тору зарур”, - дип белдерде министр.