Идарә нәтиҗәлелеген арттыру өлкәсендәге дөнья белгече Татарстан җитәкчелеге өчен лекция укыды

Бүген бизнес һәм хөкүмәт эшчәнлеген алып баруның нәтиҗәлелеген үстерү өлкәсендә алдынгы дөнья эспертларының берсе доктор Ицхак Кальдерон Адизес Татарстан җитәкчелегенә лекция укыды. ТР Хөкүмәт Йортында лекцияне ТР Президенты Рөстәм Миңнеханов, ТР Дәүләт Советы рәисе Фәрит Мөхәммәтшин, республика Премьер-министры Илдар Халиков, республика министрлыклары, федераль ведомстволар җитәкчеләре, ТР Дәүләт Советы вәкилләре тыңлады.

Доктор Ицхак Кальдерон Адизес – идарә итү теориясе буенча күп кенә тикшеренүләр һәм китаплар авторы. Соңгы 35 елда ул күп кенә дөньяның коммерция оешмалары белән эшләде, Израиль, Швеция, Греция, Бразилия, Гана, Исландия, Мексика хөкүмәте каршында сәяси мәсьәләләр буенча консультант булып торды. Адизес ысулы бөтен дөнья күләмендә “Coca-Cola”, “Bank of America”, “Volvo”, “Visa Group” кебек компанияләрдә кулланыла.

Бүген доктор Ицхак Кальдерон Адизес Казан федераль университеты белән хезмәттәшлек кысаларында Казанда булды. Татарстан Президенты ТР Хөкүмәт Йортында лекцияне ачканда докторга республика җитәкчелеге алдында чыгыш ясарга ризалык биргәне өчен рәхмәтен белдерде. “Безнең КФУ ярдәме белән мондый кызыклы кешене тыңлау мөмкинлеге бар”, - дип билгеләде Рөстәм Миңнеханов.

Ицхак Кальдерон Адизес бер сәгатьлек лекциясендә үзенең үзгәрешләр белән нәтиҗәле идарә итү теориясе турында сөйләде. “Мин Татарстанда булуыма бәхетле, чөнки сезнең республика – Россиянең иң динамик рәвештә үзгәрә торган регионнарының берсе”, - дип белдерде лектор.

Доктор фикеренчә, гаилә һәм компания яки максатчан дәүләт дәрәҗәсендә кешеләрнең бер-берсенә карата җаваплы хөрмәте һәм ышанычы - уңышлы идарә итүнең нигезе. Доктор Адизес сүзләре буенча, нәкъ менә бу сыйфатлар үзләренең сыйфатлары һәм күнекмәләре буенча төрле булган команда вәкилләренең нәтиҗәле эшен тәэмин итә ала.

Татарстан Президенты Рөстәм Миңнеханов лекция соңында аның республика җитәкчеләре өчен файдалы булачагына ышанычын белдерде.

“Без боларның барысын да беләбез кебек, ләкин һәрвакытта да бер системага тезә алмыйбыз, - дип билгеләде ТР башлыгы. – Һәрвакытта да үзебез конфликтлардан сакланып кала алмыйбыз”.

“Сезнең КФУ белән уртак эшегез сездән тагын бер кат төрле сораулар буенча консультация алырга мөмкинлек бирәчәгенә ышанабыз”, - дип мөрәҗәгать итте Рөстәм Миңнеханов доктор Адизеска.