Татарстан Президенты ФИФА инспекцион комиссиясе белән очрашты

Бүген Казанда Татарстан Президенты Рөстәм Миңнеханов 2018 елда футбол дөнья чемпионаты буенча FIFA инспекция комиссиясе вәкилләре белән очрашты.
ТР Хөкүмәт Йортында очрашуда шулай ук Татарстан вице-премьеры Әсгать Сәфәров, Казан мэры Илсур Метшин, ТР яшьләр эшләре, спорт һәм туризм министры Рафис Борһанов, республика төзелеш, архитектура һәм торак-коммуналь хуҗалык министры Ирек Фәйзуллин, Татарстан транспорт һәм юл хуҗалыгы министры Ленар Сафин, “Универсиада-2013” дирекциясе җитәкчесе Владимир Леонов катнашты.
ЧМ-2018 уеннарын уздыру планлаштырылган шәһәрләр буйлап сәфәр кылучы инспекция комиссиясенә 2014, 2018 һәм 2022 елларда дөнья чемпионатын оештыру буенча департамент җитәкчесе Юрген Мюллер, 2014, 2018 һәм 2022 елларда дөнья чемпионатын оештыру буенча департаменты проектлы идарәсенең менеджеры Ник Лау, шулай ук “Россия-2018” оештыру комитетының генераль директоры Алексей Сорокин керде.
Татарстан Президенты делегация вәкиллрәен сәламләде һәм 2013 елгы Универсиадага Казанның актив рәвештә әзерләнүен, шуңа күрә спорт һәм транспорт инфраструктурасының күпчелек өлеше футбол буенча дөнья чемпионаты уеннарына кадәр әзер булачагын билгеләде. Рөстәм Миңнеханов хәбәр итүенчә, республика туристларны җәлеп итү буенча күп эш башкара. “Казан безнең кунакларга кызыклы булыр дип уйлыйм”, - дип белдерде Татарстан башлыгы.
Ул инспекция комиссиясе вәкилләрен уздырылган инспекция сәфәре барышында әйтелгән кисәтүләрне республика җитәкчелеге исәпкә алачагына ышандырды.
“Россия-2018” оештыру комитетының генераль директоры Алексей Сорокин Казанның эре спорт ярышларын уздыруга аеруча әзер булган шәһәрләрнең берсе булуын ассызыклады.
“Казан – безнең ышанычлы шәһәрләребезнең берсе, һәм безнең сезнең белән берниди проблемалар да юк”, - дип белдерде А.Сорокин.
“Универсиада-2013” дирекциясе җитәкчесе Владимир Леонов хәбәр итүенчә, әлеге кыска вакыт эчендә генә Казанда булганда делегация вәкилләре фан-зонада, төзелә торган стадионда булачак, соңыннан Ратушада ЧМ-2018 катнашучы шәһәр сыйфатында республика башкаласын тәкъдир итү булачак. Кич белән инспекция комиссиясе Түбән Новгородка очып китәчәк.
Рөстәм Миңнеханов зур футбол ярышларына әзерләнүдә төрле илләрнең тәҗрибәләрен өйрәнүнең мөһимлеген ассызыклады. ТР Президенты FIFA вәкилләренә Татарстан вәкилләрен эшлекле сәфәрләрдә катнашучылар составына кертү үтенече белән мөрәҗәгать итте. “Без сезнең белән эшләргә әзер”, - дип ышандырды делегация вәкилләрен Р.Миңнеханов һәм аларга Казанда булганда уңышлар теләде.