Казанда “Кочевники Евразии на пути к империи” күргәзмәсе ачылды

Бүген “Эрмитаж-Казан” үзәгендә “Кочевники Евразии на пути к империи” уникаль күргәзмәсе ачылды. Анда Дәүләт Эрмитажының 2 190 экспонаты тәкъдим ителгән.
“Мондый күргәзмәләр беркайчан да булмады, бу империяләр үсеше хакында энциклопедик язма сыман һәм аны бары тик Дәүләт Эрмитажы гына күрсәтә ала”, - дип билгеләп үтте Михаил Пиотровский.
“Эрмитаж-Казан” үзәгенең унынчы юбилей күргәзмәсен ачу тантанасында ТР Дәүләт киңәшчесе Минтимер Шәймиев, Дәүләт Эрмитажы директоры Михаил Пиотровский, “Казан Кремле” музей-тыюлыгы директоры Зилә Вәлиева һ.б.катнашты.
Зилә Вәлиева билгеләп үткәнчә, Казанда яшәүчеләр “Эрмитаж-Казан” үзәгендә кызыклы күргәзмәләр узуга күнегеп бетте, әмма бүгенгесе уникаль. Күргәзмә ачу идеясен ТР Фәннәр академиясенең Ш.Мәрҗани исемендәге Тарих институты директоры Рафаэль Хәкимов тәкъдим иткән.
Михаил Пиотровский күргәзмәдә алтын һәм шулай ук гади бизәнү әйберләре дә бар дип белдерде. Аның сүзләренә караганда, күп кенә экспонатлар Дәүләт Эрмитажы музееннан беркайчан да чыгарылмаган, аларны бары тик Казанда гына күреп була.
Минтимер Шәймиев күргәзмәнең РФндә Тарих елында һәм ТРда Тарихи-мәдәни мирас елында ачылуын ассызыклады. Аның сүзләренә караганда, бүген Болгар белән Свияжски торгызылган вакытта мәдәни кыйммәтләрне саклауга һәм торгызуга кызыксыну арта.
Минтимер Шәймиев фикеренә караганда, “Кочевники Евразии на пути к империи” күргәзмәсе төрки халыкларның тарихын тагын да яхшырак белү өчен искиткеч мөмкинлек.
Михаил Пиотровский рәсми чыгышлардан соң Минтимер Шәймиевка, Рафаэль Хәкимовка һәм ТР Милли музее генераль директорына Эрмитажда узган академик Николай Лихачевның тууына 150 ел тулуга багышланган “Звучат лишь письмена” күргәзмәсе каталогын бүләк итте.