ТР Президенты шәһәр төзелешен үстерү мәсьәләләре буенча семинарларны ай саен уздырырга тәкъдим итте

Бүген Казан дәүләт архитектура-төзелеш университетында шәһәр төзелеше мәсьәләләре буенча алдынгы галимнәр катнашында министрлыклар, ведомтсволар җитәкчеләре һәм Татарстанның эре шәһәр башлыклары өчен фәнни-гамәли семинар үтте. “Дөнья шәһәрләре үзәкләрендә шәһәр төзелешен үстерү буенча иң яхшы тәҗрибәгә анализ” дип аталган темалы чарада ТР Президенты Рөстәм Миңнеханов, республика Премьер-министры Илдар Халиков, Казан, Яр Чаллы, Түбән Кама мэрлары – Илсур Метшин, Вәсил Шәхразиев, Айдар Метшин, ТР прокуроры Кафил Әмиров, бер төркем министрлыклар һәм ведомстволар, ТР Президенты Аппараты вәкилләре катнашты.
Семинар вакытында КДАТУ галимнәре һәм Мәскәү, Санкт-Петербургтан шәһәр төзелеше өлкәсендә алдынгы фәнни белгечләр бүгенге көндә дөнья тәҗрибәсендә булган шәһәр төзелеше сәясәтенә карата заманча якын килүләр турында сөйләделәр, заманча мегаполис буларак, Татарстан башкаласы үсеше перспективаларына бәйле үз фикерләре белән уртаклаштылар.
ВШЭ Урбанистика югары мәктәбе деканы Александр Высоковский бүгенге көн стандартларына җавап бирә торган Генераль планның булмавы Казанның төп шәһәр төзелеше проблемаларының берсе дип саный.
Шәһәр 1969 елда нигез салынган принцип буенча үсүен дәвам итә, Казанның үзәгендә һәм якын тирәләрдә сыйфатлы үзгәрешләр артта калып килә, дип саный ул. Эксперт фикеренчә, бүген бөтенләй башкача якын килергә кирәк. Территория рациональ рәвештә файдаланылырга тиеш, шәһәр бер үзәклелектән күп үзәкле системага күчәргә тиеш. Тарихи биналарны торгызудан тыш, Казан үзәгендә яшеллек зоналарын сакларга һәм арттырырга, кешеләр өчен тагын да уңайлы шартлар тудырырга кирәк.
Эксперт сүзләре буенча, аерым игътибарны шәһәр тирәлеген “эстетиклаштыру”га юнәлтергә кирәк.
Транспорт мәсьәләсенә килгәндә, А. Высоковский юл челтәренең бәйлелеген тәэмин итәргә, эре магистральләр төзүдән тыш, квартал эчендәге юлларга игътибар итәргә кирәклеген билгеләде.
“Казан – миссия йөкләнгән шәһәр”, - дип саный А.Высоковский. Аның сүзләре буенча, заманча Россиядә миссия йөкләнгән шәһәрләр бары икәү генә - Татарстан башкаласы һәм Санкт-Петербург. Казанның бурычы – татар цивилизациясенең дөнья үзәге булу, моннан чыгып, шәһәр төзелешенең алдынгы технологияләре нигезендә үсәргә тиешле заманча мегаполис буларак шәһәргә аерым таләпләр куела.
Галим шәһәр төзелеше сәясәтенең төп аспектлары итеп, идарә итү моделен, яхшылап социаль-икътисади тикшеренүләр нәтиҗәсендә карарлар кабул итүне атады.
Ул әгәр дә ВШЭның Урбанистика югары мәктәбенә ТР һәм Казан җитәкчелегеннән тиешле тәкъдимнәр килсә, мондый төр тикшеренүләр үткәрүдә катнашырга әзер булуын белдерде.
Архитектура докторы, Санкт-Петербург дәүләт архитектура-төзелеш университеты профессоры Валерий Нефедов семинарда катнашучыларга Европаның һәм дөньяның төрле мегаполисларында шәһәр тирәлеген оештыруның иң яхшы мисаллары турында сөйләде, Казан аларның тәҗрибәсеннән файдалана алыр иде, дип белдерде.
Рөстәм Миңнеханов семинарга йомгак ясаганда, мондый очрашуларның мөһимлеген һәм галимнәр киңәшләренең әһәмиятле булуын билгеләде.
“Белгечләрне тыңларга кирәк. Без шәхси кичерешләр белән генә яшибез – кая да булса барабыз, нәрсә булса да карыйбыз. Сез безнең хаталарның кайда булуын күрсәтергә тиеш”, - диде ТР Президенты галимнәргә мөрәҗәгатендә. Ул мондый семинарларны даими ясарга һәм аларны айга бер тапкыр уздырырга тәкъдим итте. Ләкин ул Казанга һәм республиканың башка шәһәрләренә бәйле мәсьәләләрне детальләштерергә кирәк дип саный. Моннан тыш, ТР Президенты фикеренчә, тиешле тематиканы билгеләп, район башлыкларын да семинарларда катнашырга җәлеп итәргә кирәк, чөнки яхшыртуга һәм рациональ үсешкә Татарстан шәһәрләре генә түгел, ә авыл җирлеге дә мохтаҗ.
Семинар оештыручы ТР Президенты ярдәмчесе Олеся Балтусова сүзләре буенча, бу көннән архитектура университеты респубика җитәкчелеге өчен даими белем бирү программалары мәйданына әйләнә. Шәһәр төзелешендә һәм тарихи үзәкләрне үстерүдә дөньяның шәһәрләре буйлап үткән хаталар бар, һәм, мөгаен, аларны эре Россия шәһәрләре, шул исәптән, Казан да кабатлый. Нәкъ менә шундый нәтиҗә ясап, Рөстәм Миңнеханов Илсур Метшинга һәм Олеся Балтусовага КДАТУ белән бергә алдагы семинарларның, шул исәптән, укыта торган күчмә семинарларның программасын эшләргә кушты.