Рөстәм Миңнеханов: "Ведомствоара электрон хезмәттәшлек системасы безне нәтиҗәлерәк эшләргә өйрәтәчәк"

Татарстанда гражданнарга дәүләт һәм муниципаль хезмәт күрсәтү өчен хакимият органнары арасында мәгълүмат алмашу яңа электрон система ярдәмендә башкарылачак. Бу хакта бүген ТР Хөкүмәт йортында Татарстан Президенты Рөстәм Миңнеханов үткәргән киңәшмәдә белдерелде.

2012 елның 1 июленнән башлап федераль закон таләпләре буенча хакимият органнары дәүләт һәм муниципаль хезмәт күрсәткәндә башка органнарда булган мәгълүматны таләп итәргә хокуклы булмаячак. Татарстанда мәгълүмат алмашу өчен Ведомствоара электрон элемтә төбәк системасы булдырылды.

Вице-премьер – ТР мәгълүматлаштыру һәм элемтә министры Роман Шәйхетдинов белдергәнчә, Татарстандагы федераль органнарга, республика министрлыклары һәм ведомстволарына, муниципалитетларга 91 төрле мәгълүмат белән алмашырга кирәк булачак.

Татарстан Президенты фикеренә караганда, яңа система кертү түрәләр өчен билгеле кыенлыклар тудырачак, әмма киләчәктә уңай нәтиҗә бирәчәк. “Онлайн режимда эшләргә өйрәнәчәкбез, өч ай кыенлыклар кичерсәк, аннары нәтиҗәлерәк эшләячәкбез", - диде Рөстәм Миңнеханов.

Президент түрәләр белән өйрәтүче семинарлар үткәрүне, һәр министрлыкта һәм ведомствода яңа система кертүгә җаваплы затларны билгеләүне йөкләде. Р.Миңнеханов атна саен видеконференция режимында уздырылган киңәшмәдә системаны кертү турында доклад тыңларга вәгъдә итте.