Рөстәм Миңнеханов: “Нефть - чималга бәйлелек түгел, ә өстенлекле чимал”

“Бүген компания төп бизнесы булган нефть табудан тыш, яңа юнәлешләр булдыра, эшчәнлеген үстерә”, - диде Рөстәм Миңнеханов һәм компаниянең инновацион үсешен аерым билгеләп үтте. Аның сүзләренә караганда, әгәр ул инновацияләр белән шөгыльләнмәсә, елына 26 миллион тонна нефть чыгара алмас иде. Бүген “Татнефть” тарафыннан табыла торган чималның 46 процентка якыны яңа технологияләр ярдәмендә гамәлгә ашырыла.
“Компаниянең күп елларга перспективасы барлыгына ышанам, - диде ТР Президенты.
"Татнефть" 5-6 ел элек битум нефтен чыгаруга кереште, Канада тәҗрибәсен өйрәнде һәм бүген технологияләр әзерләде. Хәзер Ашальчнское нефть табу урыныннан бер көндә 200 тонна нефть чыгаралар. Бу уңышка зур тәҗрибәгә югары профессональлеккә ия булган коллективтан, фәннән башка ирешеп булмас иде. Киләчәктә дә бу юнәлеш буенча эшләү зарур, дип саный Рөстәм Миңнеханов. Аның сүзләренә караганда, “бу безнең территориядәге көндәшлелеккә сәләтле ресурс”.
Компания бизнесен диверсификацияләү карарын бик дөрес дип атады ул, бүген аның заманча нефть эшкәртү заводы бар. “Зур инвестицияләр таләп иткән мондый эшләрне бары тик көчле компания гына башкара ала, элек мондый объектлар КПСС ЦК химасында төзелгән”, - диде республика башлыгы.
“Без ирешелгән уңышларда гына тукталып калмаячакбыз, “ТАНЕКО” ның эшкәртү тирәнлеге арттырылачак, нефть химиясе процесслары өстәләчәк. Булган чималдан өстәмә кыйммәттне алырга кирәк. Нефть - чималга бәйлелек түгел, ә өстенлекле чимал”, - дип ассызыклады Рөстәм Миңнеханов.
“ТАНЕКО” төзелешенең беренче этабы уңышлы тәмамлануын искәртеп, 2016 елга бу идеяне тулысынча чынга ашырачакбыз, дип белдерде ул. Моннан тыш, республика башлыгы “Татнефть” заманча шин комплексы булдыруга иреште дип билгеләп үтте.
ТР Президенты республиканың үсеш перспективалары турында сөйләгәндә, “Татнефть”нең икътисадны диверсификацияләүгә зур өлеш кертүен бәяләде һәм компания коллективына, шулай ук нефть чыгарыла торган муниципаль берәмлекләр башлыкларына рәхмәт белдерде.