Татарстан Президенты Европа-Татарстан чиста технологияләр фонды җитәкчелеге белән очрашты

Бүген Татарстан Президенты Рөстәм Миңнеханов белән фонд җитәкчлегенең очрашуында Европа-Татарстан чиста технологияләр фонды катнашында Татарстанда тормышка ашырыла торган перспектив проектлар турында сөйләшенде. Очрашуда ТР Премьер-министры Илдар Халиков, вице-премьер – республиканың мәгълүматлаштыру һәм элемтә министры, “Связьинвестнефтехим” ААҖ генераль директоры Валерий Сорокин, шулай ук компаниягә нигез салучы Йохен Вермут җитәкчлегендә “Wermuth Asset Management” компаниясе делегациясе катнашты.
Европа-Татарстан чиста технологияләр фонды 2011 елда Татарстан һәм “Wermuth Asset Management” Германия компаниясе тарафыннан оештырылган. Фондның төп максаты – Татарстанга чит илнең югары технологияле компанияләрен җәлеп итү, республикада энергия саклау, яңадан булдырыла торган энергия чыганаклары, калдыкларны эшкәртү өлкәсендәге эшләнмәләрне кулланып, җитештерү булдыру.
Бүгенге очрашу вакытында “Wermuth Asset Management” компания вәкилләре, аерым алганда, Иннополис проектын ясаганда һәм төзегәндә чиста технологияләрне кулланырга тәкъдим итте.
Татарстан Президенты тәкъдимне хуплады һәм хәзерге вакытта яңа шәһәрне җентекләп проектлауның баруын, аның барышында энергия ресурсларын саклау технологияләрен куллануны карарга кирәклеген билгеләде. Аерым алганда, Рөстәм Миңнеханов Иннополиста бүлмәләрне җилләтү һәм җылыту өчен җылылык насосларын кулланырга тәкъдим итте.
Шулай ук, Татарстанда тормышка ашыру өчен, авыл хуҗалыгы сәнәгатенә калдыкларны эшкәртү һәм агач эшкәртү сәнәгатенә биогаз проектлары тәкъдим ителде.
Татарстан Президенты Рөстәм Миңнеханов республиканың мондый биогаз җайланмалары проектлары белән кызыксынуын раслады. Республика башлыгы фикеренчә, Яшел Үзәндәге фанер җитештерүдә бик күп агач калдыклары бар, моннан тыш, җайланмаларны дуңгыз һәм кош фермалары янына урнаштырырга була, моның белән калдыкларны утильләштерү мәсьәләсе хәл ителә.
Энергия саклау турында әйткәндә, Рөстәм Миңнеханов тулай төбәк продуктының энергия сыешлылыгын киметү буенча соңгы 12 ел эчендә републиканың уңышларын билгеләп үтте.
“Безнең фондның эше чиста технологияләрне җәлеп итүдән гыйбарәт, - дип белдерде Рөстәм Миңнеханов. – Безгә Иннополис, шәһәр төзелеше, энергияне нәтиҗәле җитештерү буенча партнерлар кирәк”.
Татарстан Президенты фонд эшенең конкрет юнәлешләре турында сөйләшү өчен берничә эш төркемнәре булдырырга кушты. Очрашуда катнашучылар конкрет проектлар турында җентекләп сөйләшү өчен сентябрь башында очрашырга килештеләр.