Актанышта ТР Президенты катнашында агросәнәгать комплексы мәсьәләләре буенча семинар-киңәшмә уза

Татарстан Президенты Рөстәм Миңнеханов ТР Авыл хуҗалыгы һәм азык-төлек министрлыгының авыл хуҗалыгы берләшмәләрен югары квалификацияле белгечләрне җәлеп итүгә стимуллаштыру турындагы идеясен хуплады. Бу мәсьәлә бигрәк тә Россиянең Бөтендөня сәүдә оешмасына кергәндә, үзебездә җитештерелгән авыл хуҗалыгы продукциясен көндәшлелеккә ия итү буларак бигрәк тә актуаль. Бу проблема бүген Актаныш муниципаль районында агросәнәгать комплексы мәсьәләләре буенча семинар-киңәшмәсе кысаларында оештырылган агросәнгать күргәзмәсен караганда кузгатылды.
Хәзерге вакытта республиканың күп хуҗалыкларында квалификацияле агрономнарны җәлеп итү проблемасы кискен тора. ТР Авыл хуҗалыгы һәм азык-төлек министрлыгының тәкъдиме штатта агрономнары булмаган һәм 1 мең гектардан артык җир эшкәртүче хуҗалыкларга дәүләт ярдәме күрсәтмәүдә чагыла. Бүгенге көндә республикада андый хуҗалыклар бар. Рөстәм Миңнеханов министрлык позициясе белән килеште һәм әлеге инициативаны хуплады.
“Башак” хуҗалыгы кырларында оештырылган күргәзмәне караганда, ТР Президенты авыл хуҗалыгы техникасы үрнәкләре, игенчелек, үсемлекчелек һәм терлекчелек өлкәсендәге яңа технологик эшләнмәләр белән танышты. Моннан тыш, республика башлыгы Рәдиф Исламхуҗинның гаилә терлекчелек фермасында булды. Хәзерге вакытта хуҗалыкта 30дан артык мөгезле эре терлек, шул исәптә 24 савым сыеры бар. Беренче ярты елда фермада 680 центнер сөт җитештерелгән, бер сыердан уртача көнлек савым 15 литр тәшкил итә. Хуҗалыкта 3 кеше генә эшли, уртача хезмәт хакы 13 мең сум тәшкил итә.
Бу минутларда Актанышта республика семинар-киңәшмәсенең пленар утырышы уза.