Минтимер Шәймиев Парижда Франческо Бандарин белән очрашты һәм Шартр шәһәрендә булды

ЮНЕСКО Бөтендөнья мирасы комитеты чакыруы буенча ТР Дәүләт киңәшчесе Минтимер Шәймиев җитәкчелегендәге Татарстан делегациясе Парижга килде, ЮНЕСКО штаб-фатирында булды.

Татарстан делегациясенең Франциягә эш сәфәренең максаты – Франция реставраторлары һәм археологларының археология объектларын консолидацияләү һәм консервацияләү буенча тәҗрибәләрен Болгарда һәм Свияжскида тарихи һәйкәлләрне торгызуда файдалану өчен өйрәнү.

Кичә, сәфәрнең беренче көнендә ТР Дәүләт Киңәшчесе Минтимер Шәймиев ЮНЕСКО генераль директорының мәдәният буенча урынбасары Франческо Бандарин белән очрашты. Минтимер Шәймиев аңа “Яңарыш” фонды тарафыннан Болгар тарих-архитектура музей-тыюлыгында һәм Свияжски тарих-мәдәният һәм ландшафт комплексы территориясендә үткәрелә торган эшләр турында сөйләде. Бандарин әфәнде бу проект белән кызыксынуын һәм аның киңкүләмле булуына соклануын белдерде. Ул шулай ук Татарстанга килеп барысын да үз күзләре белән күрү теләген булуын әйтте: “Мин Россияне, аның мәдәниятен һәм әдәбиятен бик яратам. Мин Санкт-Петербургта, Улан-Удэда, Байкал күлендә булдым. Казанны, Болгарны һәм Свияжскины да күрәсем килә”, - диде ул.

Очрашу нәтиҗәсе буенча ТР Дәүләт киңәшчесе Минтимер Шәймиев белән ЮНЕСКО генераль директорының мәдәният буенча урынбасары Франческо Бандарин арасында Болгар белән Свияжскины һәйкәлләрен саклау һәм реставрацияләү өлкәсендә эшләү буенча ниятләр турындагы беркетмә имзаланды.

Шул ук көнне ТР Дәүләт киңәшчесе җитәкчелегендәге Татарстан вәкилләре Шартр шәһәрендә булды.

Шулай ук Шартр мэры урынбасары белән очраштылар, ул Татарстан делегациясен мэрия исеменнән сәламләде. “Без Бөтендөнья мирасы объекты - Кафедральный собор булган шәһәргә килүегез белән горурланабыз. Казан белән Шартр арасында ныклы мөнәсәбәтләр урнашачагына ышанам”, - дип билгеләп үтте ул һәм Минтимер Шәймиевка Болгар белән Свияжски турында мавыктыргыч итеп сөйләве өчен рәхмәт белдерде.

Аннары татарстанлылар Шартрда археологик казу эшләре барган урында булды. Бу эшләр галло-роман чоры объектларында үткәрелүе белән кызыклы. Шуңа күрә, анда Болгардагы кебек археология объектларын саклау һәм консервацияләү мәсьәләләре актуаль. Минтимер Шәймиев Франция археологлары һәм реставраторлары белән фикер алышты, дөньяви стандартларга тулысынча туры килә торган итеп археология һәйкәлләрен саклау ысуллары буенча фикерен белде. Моннан тыш, Шартрда казылмаларда Болгардагы кебек керамик мич табылган. Бу бик сирәк археологик объектлар, аларны саклау өчен фәнни яктан җентекләп өйрәнү зарур.

Бүген делегация Лувр һәм Версаль сараенда булачак. Шулай ук Лувр реставрацияләү лабораториясе директоры Мария Лавандье, Франция Мәдәният министрлыгының Халыкара хезмәттәшлек департаменты директоры Бруно Фавел һәм Версаль сарай-паркы ансамбленең баш архитекторы Пьер-Андре Лаблод белән очрашулар көтелә.

Иртәгә ТР Дәүләт Киңәшчесе Минтимер Шәймиев Сорбонда XXVII Бөтендөнья җәйге универсиада утын кабызу тантанасында катнашыр дип көтелә, ул ут ялкыны 2012-2013 елларда бөтен дөнья шәһәрләре буенча йөриячәк һәм 2013 елның июлендә Универсиаданы ачу өчен Казанга киләчәк.

Татарстан делегациясе составында ТР Президентының социаль мәсьәләләр буенча ярдәмчесе, ТР тарих һәм мәдәният һәйкәлләрен торгызу фондының башкаручы директоры Татьяна Ларионова, ТР мәдәният министры Айрат Сибагатуллин, Татарстан Республикасының Франция Республикасындагы тулы вәкаләтле вәкиле Искәндәр Йосыпов һ.б. бар.