Рөстәм Миңнеханов: Татарстанны Израиль белән сәламәтлек саклау, мәгариф, инновацияләр өлкәләрендә хезмәттәшлек кызыксындыра

Татарстан Республикасын Израиль дәүләте белән сәламәтлек саклау, мәгариф, инновацияләр өлкәсендә хезмәттәшлек итү кызыксындыра. Бүген бу хакта Татарстан Республикасы Президенты Рөстәм Миңнеханов Израиль Дәүләтенең Россия Федерациясендәге Гадәттән тыш һәм Тулы вәкаләтле илчесе Дорит Голендер белән очрашуда белдерде.
ТР Хөкүмәт йортында узган очрашуда Татарстан ягыннан ТР Премьер-министры урынбасары – ТР сәнәгать һәм сәүдә министры Равил Зарипов, ТР мәгариф һәм фән министры Альберт Гыйльметдинов, РФ Тышкы эшләр министрлыгының Казандагы вәкиле Радик Вахитов, “Федераль еврей милли-мәдәни автономиясе” иҗтимагый оешмасы президенты, Татарстан еврей милли-мәдәни автономиясе президенты Михаил Скоблионок катнашты.
Республика башлыгы Дорит Голендерне сәламләп, Татарстанда 100дән артык милләт һәм төрле дин вәкилләре дус һәм килешеп яши дип белдерде. Ул республикада еврей җәмгыяте актив эшчәнлек алып бара диде. Шулай итеп, шәхси-дәүләт партнерлыгы принцибында гомумбелем бирү мәктәпләрендә ремонт башкарыла. Узган елның июнь аенда Казанда Халыкара еврей музыкасы фестивале уңышлы узды.
Рөстәм Миңнеханов республикага төрле юнәлеш буенча белгечләрнең, шул исәптә медицина хезмәткәрләренең, инновацион тармак белгечләренең квалификацияләрен арттыру кызыклы дип билгеләп үтте. Казанның Наноразмер технологияләре үзәге белгечләре Израильдә әзерлек узуын белдерде.
“Бүген мәгариф өлкәсендә күп илләр белән мөнәсәбәтләр урнаштырырга телибез, - диде ТР Президенты. – Студентлар һәм белем бирү программалары белән алмашу буенча эшләр бара. Без шулай ук Израиль белән мәгариф үзәкләре булдыру һәм халыкара дипломнар алу буенча да хезмәттәшлек итү белән кызыксынабыз”.
Израиль Дәүләтенең Россия Федерациясендәге Гадәттән тыш һәм Тулы вәкаләтле илчесе Дорит Голендер потенциалны үстерү, хезмәттәшлекне ныгыту зарур дип белдерде. Аның фикеренә караганда, мәдәни элемтәләрне ныгыту мөһим. Израиль Татарстанда кино фестивале үткәрергә, башка мәдәни чараларны оештырырга әзер дип белдерде илче. Ул, аерым алганда, 2011 елда Израильдә Татар музыкасы фестивале уңышлы узуын билгеләп үтте.
Дорит Голендер Татарстан Президенты Рөстәм Миңнехановны Израиль дәүләтенә ил турында күбрәк белергә, җайга салынган элемтәләрне ныгытырга чакырды.
Очрашуда яклар Казаннан Израильнең бер шәһәренә туры авиаочыш булдыру мәсьәләсе буенча фикер алышты. Рөстәм Миңнеханов бүген Казаннан Төркия, Германия, Берләшкән Гарәб Әмирлекләренә һ.б. илләргә туры авиочыш җайга салынган дип ассызыклады.
Очрашу ахырында яклар истәлекле сувернирлар белән алмашты.