Рөстәм Миңнеханов "Кабан күле серләре" фильмын төшерү урынында булды

Бүген Татарстан Президенты Рөстәм Миңнеханов Казанда “Кабан күле хәзинәләре” кинофильмын төшерү мәйданчыгында булды. Республика башлыгы төшерү төркеме вәкилләре белән аралашты һәм төшерү урыннарын карады. Республика башлыгы өчен төшерү мәйданчыгы буйлап экскурсияне фильмның генераль продюсеры Вадим Быркин уздырды.

ТР Президенты фильмда төшүче актерлар - Алексей Воробьев, Эльвира Ибраһимова, Сергей Шакуров һ.б. белән очрашты. ТР Президенты актерларның киенү-бизәнү бүлмәләре һәм төрле техник җайланмалар урнашкан махсус төшерү трейлерларын карады. Монда Татарстан башлыгына яңа фильмның беренче трейлеры тәкъдим ителде.

Вадим Быркин сөйләвенчә, авторлар идеясе буенча, фильм “Необыкновенные приключения итальянцев в России” совет кинофильмын хәтерләтергә тиеш. Сюжет буенча “Кабан күле хәзинәләре” геройлары да Явыз Иван чорында күл төбендә югалган хәзинәне эзлиләр. Моннан тыш, яңа фильмда үзенчәлекле тарихи күргәзмәләр була.

Продюсер сүзләренчә, фильмны төшерү эшләре Казанның иң матур урыннарында – Кремльдә, Казансу буенда, Кабан күлендә барган. Төшерү эшләрендә һәр көнне Мәскәүдән һәм Татарстаннан якынча 150 кеше эшли, якынча 20 махсуслаштырылган төшерү техникасы җәлеп ителгән. Вертолеттан төшерү инде булган, ә августта фильмның кайбер өлешләрен су астында төшерергә планлаштырыла. План буенча Казанда төркемнең эше 6 августка кадәр дәвам итәчәк.

Татарстан Президентына фильмның генераль продюсеры хәбәр итүенчә, фильм Универсиада алдыннан кинотеатрларда һәм телевидениедә күрсәтелсен өчен, 2013 елның март аенда маҗаралы комедияне прокатка чыгару планлаштырыла. Уйлап табучылар нияте буенча, “Каба күле хәзинәләре” Казанга өстәмә туристларны җәлеп итәчәк.

Рөстәм Миңнеханов фильмны төшерү мәйданчында булу соңында төшерү төркеме вәкилләре белән фотога төште.