Татарстан Республикасы белән "Россия Саклы банкы" ААҖ арасында килешү имзаланды

Россия Саклык банкы продукциясенең яңа линияен кертү буенча Татарстан беренче төбәк булачак. ТР кече һәм урта бизнес вәкилләре, шулай ук авыл хуҗалыгы житештерүчеләре беренче нәтиҗәләрне тоячак. Бу хакта бүген “Россия Саклык банкы” ААҖ идарәсе президенты, рәисе Герман Греф Казан Кремлендә Татарстан Президенты Рөстәм Миңнеханов белән очрашудан соң журналистларга белдерде.

Искәртеп узабыз, кичә Рөстәм Миңнеханов белән Герман Греф катнашында Сбербанкиада-2012 старт алды.

Очрашуда “Россия Саклык банкы” ААҖ белән Татарстан Республикасы арасында хезмәттәшлек турында килешү имзаланды. Документка Рөстәм Миңнеханов белән Герман Греф имза куйды. Килешүдә якларның финанс-кредит өлкәсендәге юнәлешләре билгеләнде.

Саклык банкы белән килешү төзелү нәтиҗәсендә, банк 2012-2013 елларда Казанның ТЭЦ-3, Түбән Каманың ТЭЦ-1 производство җиһазларын, Татарстан электр челтәрләрен модернизацияләү, ТР да орлыкларны тирәнтен эшкәртү комплексы һәм майлылыгы аз булган продукция җитештерүче завод төзү, “ТАИФ-НК” ААҖ нефть эшкәртү заводының авыр калдыкларын тирәнтен эшкәртү комплексы, “Түбән Кама Нефтехим” ААҖ этилен комплексы төзү, “Казан” халыкара аэропортының икенче чиратын төзү һәм беренче чиратын төзекләндерү һ.б. кебек эре инвестицион проеткларны финанслауда катнашачак.

Документта башка юнәлешләрдә бергә эшләү юнәлешләре дә теркәлгән. Шулай итеп, Саклык банкы кече һәм урта эшмәкәрлек предприятиеләренә кредит бирүне хәл итү вакытын кыскартырга, кредит заявкаларын карау технологияләрен камилләштерергә ниятли.

“Килешү төзегәннән соң республика белән мөнәсәбәтләр юнәлеше киң күләмле булачак, дип билгеләп үтте Герман Греф журналистларга биргән әңгәмәсендә. – Рөстәм Нургалиевич бергә эшли торган юнәлешләрнең кайберләрен киңәйтү кирәк булуга игътибар юнәлтте. Без бу мәсьәләгә җитди игътибар бирәчәкбез. Россия Саклык банкы продукциясенең яңа линиясен кертү буенча Татарстан беренче төбәк булачак. Без республика белән хезмәттәшлек итүдән канәгать”. Греф сүзләренә караганда, килешүне гамәлгә куюның беренче нәтиҗәләрен кече һәм урта бизнес вәкилләре, шулай ук авыл хуҗалыгы житештерүчеләре сизәчәк.

Рөстәм Миңнеханов билгеләп үткәнчә, Саклык банкы ТР да иң заманча технологияләрне тормышка ашыра. “Бүген килешү имзалап, кече һәм урта эшмәкәрлек, инфраструктура, социаль проектлар, кадрлар әзерләү һ.б. буенча да бергә эшләячәкбез. Бу килешү безнең эшчәнлек кырын киңәйтә, - дип ассызыклады ТР Президенты. Иң мөһиме – электрон элемтә, электрон краталар буенча эш башкару. Бу юнәлешләр буенча эш яхшы нәтиҗә бирер һәм кешеләр моны сизәр дип өметләнәм”.

Татарстан башлыгы сүзләренә караганда, Кама сәнәгать кластерында хезмәттәшлек итүне ныгыту буенча килешү төзелгән. “Без 3 тапкырдан артык үсү бурычын куябыз. Ә җитди партнердан, кушылудан башка бу мәсьәләне хәл итү мөмкин түгел”, - диде ул.

“Саклык банкы безгә һәрвакыт ярдәм итә. Алар киләчәктә дә стратегик партнер булыр дип өметләнәбез, - диде Рөстәм Миңнеханов. – Ә без Саклык банкы партнеры”.

Герман Греф үз чиратында, Татарстан белән килешү төзү буенча чикләр куелмаган дип белдерде. “Бүген кредит портфеле 120 млрд. сум тәшкил итә”, - диде ул.

10 июльдән кече һәм урта бизнес өчен “Деловая среда” банкының яңа продукты арттырылачак дип белдерде Греф яңа продукт линиясе турында. “Әлегә сынау тәртибендә булачак. Ел ахыында продуктны кулланылышка чыгара алырбыз, дип ышанам, - диде ул. – Татарстанның электрон хезмәтләр күрсәтү, яңа технологияләр кертүдә алга киткәнен исәпкә алып, биредә төп сынау мәйданчыгы булыр дип ышанам. Шул исәптә Татарстан белән бергә эшләү тәҗрибәсе нигезендә компанияне теркәү, хокукларны теркәү системасын кыскартуга кагылышлы федераль законнарга төзәтмәләр кертә алырбыз дип ышанам. Бу илдә инвестицион климатны җитди яхшырту мөмкинлеге бирә дип уйлыйм”.