Павел Астахов: “Татарстанның уңай тәҗрибәсен башка төбәкләр белән уртаклашу зарур”

Октябрь башында Казанда РФ субъектларында бала хокуклары буенча вәкилләрнең VI Бөтенроссия съезды уза. Бу хакта бүген журналистларга РФ Президенты каршындагы бала хокуклары буенча вәкил Павел Астахов ТР Хөкүмәт йортында Татарстан Президенты Рөстәм Миңнеханов белән очрашудан соң белдерде.

Бүген 2011 елда Татарстанда үткәрелгән тикшерүдән соң РФ субъектларында бала хокуклары буенча вәкилләр комиссиясе тарафыннан калдырылган тәкъдимнәр буенча эш нәтиҗәләре күрсәтелде, дип билгеләп үтте Павел Астахов.

“Мине Татарстанда табылган проблемалы мәсьәләләрне хәл итү кызыксындырды. Без һәр пункт буенча җавап кына түгел, ә башкарылган эшләр буенча дәлилләр дә алдык”, - дип ассызыклады балалар омбудсмены. Аерым алганда, бик аяныч хәлдәге “Росток” психологик ярдәм үзәге ремонтына 14 млн. сумнан артык акча бүлеп бирелде”, дип билгеләп үтте ул.
“Хәзер биредә ремонт бара, әлеге уникаль үзәк балаларга һәм аларның ата-аналарына ярдәм итә. Бу Татарстанда балалар суицидлары очраклары арту сәбәпле әһәмияткә ия”, - дип билгеләп үтте П.Астахов. Моннан тыш, ул Татарстанда клиник психолог, психиатр һәм суицидолог кебек белгечлекләр буенча укыту курслары үткәрелүдән канәгать булуын белдерде. Балалар һәм ата-аналар, укытучылар өчен суицид очракларын кисәтү максатынан җыелышлар үткәрелә һәм планлаштырыла.

Татарстанда ата-ана тәрбиясеннән мәхрүм балалар һәм ятимнәр учреждениеләренең күбесе канәгатьләнерлек хәлдә. “Балалар учреждениеләрендә ачыкланган проблемалар буенча киңәшмә үткәрергә тәкъдим иткән идек, ул 15 майда узды. Республикада мондый киңәшмәләр еш үткәрелә”, - дип белдерде П.Астахов.

Ул шулай ук Татарстанда балигъ булмаган кызлар тарафыннан ясатылган оборт саны кимүен билгеләп үтте. “Бу урыннарда, хатын-кызлар консультацияләрендә әлеге мәсьәлә белән шөгыльләнүче белгечләр пәйда булу, моннан тыш, мәктәпләрдә гаилә кыйммәтләре буенча әңгәмәләр үткәрү белән бәйле”, - диде балалар омбудсмены.

Бүген республика башлыгы белән фикер алышкан мөһим мәсьәләләнең берсе – Казанда октябрь башында РФ субъектларында бала хокуклары буенча вәкилләрнең VI Бөтенроссия съезды, шулай ук балигъ булмаганнар эшләре һәм хокукларын яклау комиссиясе белегечләре өчен өйрәтүче семинар үткәрү.

“Россиянең төрле төбәкләрендә, шул исәптә Татарстанда булган уңай тәҗрибә белән уртаклашу зарур. Съездга күп балалы гаиләләрне, шулай ук сезнең республикадагы уникаль Аталар ассоциациясе вәкилләрен чакырабыз”, - дип белдерде П.Астахов.

Съездда “Россия без сирот” программасы буенча фикер алышачакбыз. “Без бүген фикер алыша торган концепция "Россия без сирот" федераль максатчан программага кушылырга тиеш, чөнки балалар йортларын киметергә кирәк. Бу юнәлештә Татарстан уңай нәтиҗәләр күрсәтә: соңгы 4 елда республикада 8 балалар йорты ябылды, нигездә, гаиләләр бала алу исәбенә”, - дип билгеләп үтте П.Астахов.

Аның сүзләренә караганда, республикада яңа гаиләле булган балалар саны арта, ата-ана тәрбиясеннән мәхрүм калган балалар саны кими.