Рөстәм Миңнеханов белән Владимир Мау Татарстанда Россия халык хуҗалыгы һәм дәүләт хезмәте академиясенең җәйге мәктәбен ачтылар

22-29 июль көннәрендә Татарстанда беренче тапкыр Президент академиясенең җәйге кампусы уза. Чараны РФ Президенты каршындагы академия, Татарстан Хөкүмәте һәм АКИГ компанияләр төркеме оештыра. Кампус ул - белем бирү форумы. “Казан” тау чаңгысы комплексына РФ Президенты академиясеннән, Татарстан вузларыннан 200ләп иң яхшы студент, “Россиянең тотрыклы киләчәге” Бөтенроссия конкурсында катнашучылар җыелган. Әйтергә кирәк, 50 студент республика югары уку йортларында белем ала.

Бүгенге ачылыш тантанасында ТР Президенты Рөстәм Миңнеханов, РФ Президенты каршындагы академия ректоры Владимир Мау һәм башка рәсми затлар катнашты.

“Хыяллар чынга аша. Минем яшьрәк хезмәттәшләрем кампус оештыру тәкъдиме белән чыккач, мин, бу оештыру ягыннан катлаулы мәсьәлә дип, икеләнеп калган идем, аны Татарстанда үткәрү тәкъдиме яңгырагач, бу эшнең уңышлы килеп чыгачагында шик калмады. Кичә бирегә килгәч, барысы да искиткеч булуына инандык”, - дип Владимир Мау Рөстәм Миңнехановка мондый мөмкинлек өчен рәхмәтен җиткерде һәм кампусны биредә ел саен оештырырга әзер булуына да ишарәләде.

Президент исә сәламләү чыгышында кампусның Татарстанда үткәрелүе республика өчен дә зур горурлык булуын ассызыклап үтте. Рөстәм Миңнеханов биредә IT-шәһәр төзеләчәге, киләсе елда Универсиада кабул итүгә әзерлек, шулай ук Казанның 2015 елда Казанда узачак Спортның су төрләре буенча дөнья чемпионатына һәм 2018 елда көтеләчәк Футбол буенча дөнья чемпионатында катнашырга әзерләнүе турында сөйләде. “Без сезне биредә кунак булып кына күрергә түгел,үзегезнең сәләтләрегезне ачып, мөмкинлекләрегезне тормышка ашыруыгызга да шат булыр идек”, - дип белдерде Рөстәм Миңнеханов.

Җәйге кампус программасы булачак икътисадчылар, финансистлар һәм дәүләт хезмәткәрләре өчен интенсив укуны, танылган дәүләт эшлеклеләре һәм эшмәкәрләр белән генә очрашуны түгел, актив ялны: спорт чараларын, экскурсия һәм дискотекаларны үз эченә ала. Ил белән киләчәктә идарә итәргә теләүче студентлар өчен РФ Дәүләт Думасы рәисе урынбасары Андрей Воробьев, РФ элемтә һәм гаммәви коммуникацияләр министры Николай Никифоров, Киров өлкәсе губернаторы Никита Белых һ.б. лекцияләр курсын укыячак.

Бүгенге очрашу дәвамында студентлар Рөстәм Миңнехановка һәм Владимир Мауга күпсанлы сорауларын яудырды.