Рөстәм Миңнеханов РФдә кыска көпшәле коралны легальләштерүгә каршы булуын белдерде

ТР Президенты Рөстәм Миңнеахнов Россиядә кыска көпшәле коралны легальләштерүгә каршы булуын белдерде. Бу хакта ул бүген республиканың бер төркем ММЧ вәкилләренә “Корал турында”гы законны реформалаштыру мәсьәләсенә аңлатма биргәндә белдерде.

“Мин Чечня башлыгының һәрбер кешегә коралны тарата башларга әле иртә дигән фикере белән килешәм. Хәтта бик нык үсеш алган илләр өчен кинотеатрларда һәм мәктәпләрдә атышу җитди мәсьәләгә әйләнә, ә безнең илдә, көнкүрештә агрессия дәрәҗәсенең үсүенә бәйле рәвештә, дарыны шырпыдан ераграк тоту хәерле”, - ди Рөстәм Миңнеханов.

Исегезгә төшерик, бу көннәрдә Чечня Республикасы башлыгы Рамзан Кадыйров Россиядә кыска көпшәле коралны легальләштерүгә каршы чыкты, чөнки илдә аны саклау һәм йөртү традицияләре югалган.

“Россиядә пистолетлар алырга иртә. Илдә коралны саклау һәм йөртү традицияләре юк, ә патша Россиясе чорындагылар югалтылган, - дип аңлатып китте “Коммерсант” басмасы белән әңгәмәдә Чечня башлыгы. - Әлегә бездә хәтта травматик корал белән дә эш итә белмиләр – нинди генә инцидент булмасын, атыш башлана”.

Моннан элегрәк “Корал турында”гы законны реформалаштыруга бәйле закон чыгару инициативасы белән Федерация Советының беренче вице-спикеры Александр Торшин чыкты: ул җинаять ясамыйча, саклану максатыннан файдаланып булачак кыска көпшәле коралны легальләштерергә тәкъдим итте.

Хәзерге вакытта федераль закон чыгару органы гражданнарның хәрби пистолетларны үзләрендә саклауны тулысынча тыя.