Данил Садыйковка үлгәннән соң “Батырлык ордены” тапшырылды

Агымдагы елның 5 маенда Чаллы шәһәренең Энтузиастлар бульварында булган фаҗига буенча җинаять эшен тикшерү тәмамланган. Якын көннәрдә материаллар судка юлланачак. Бу хакта бүген Казан Кремлендә узган чарада РФ Тикшерү комитеты рәисе Александр Бастрыкин хәбәр итте. Ул бала гомерен коткарганда һәлак булган 12 яшьлек Данил Садыйковның әти-әнисенә гаеплеләрнең лаеклы җәзасын алачагын ышандырды.
Агымдагы елның 12 июлендә РФ Президентының экстремаль шартларда кеше гомерен коткаруда күрсәткән батырлыгы өчен Данил Садыйковны үлгәннән соң “Батырлык ордены” белән бүләкләү турындагы Указы дөнья күргән иде. Тикшерү комитеты башлыгы бүген Казан Кремлендә Данилның әти-әнисе – Айдар һәм Наталья Садыйковларга шушы дәүләт бүләген тапшырды. Чарага Данилның кыз туганы Диана да килгән иде. Очрашу һәм бүләкләү чарасы ТР Президенты Рөстәм Миңнеханов катнашында узды.

Билгеле булганча, 12 яшьлек Данил Чаллының Энтузиастлар бульварында фонтанга егылып төшкән 9 яшьлек Андрей Чурбановны коткарыр өчен суга ташлана. Малайларны шул вакытта электр тогы суга. Якыннан узып баручы полициянең патруль-пост хезмәткәрләре бәлагә таручыларны судан чыгаруга ирешә, ләкин Данилның гомерен генә саклап калып булмый, ул хастаханәдә җан бирә. Урында тикшерү барышында фонтан территориясендә электр җиһазларын монтажлаганда иминлек таләпләренең исәпкә алынмавы ачыкланган иде. Әлеге фаҗига буенча “Затларның һөнәри вәкаләтләрен тиешенчә үтәмәве нәтиҗәсендә үлемгә китерү” дигән маддә буенча җинаять эше кузгатылып, аны тикшерүне РФ Тикшерү комитеты җитәкчелеге үз контроленә алган иде.

Улларын югалткан Садыйковларның күңел яралары ачык, күзләрендә яшь кипмәгән. “Әти-әнисенең нинди газаплар кичерүен күз алдына да китерергә кыен”,-ди Александр Бастрыкин. Аның белдерүенчә, малайның үз гомерен куркыныч астына куеп ярдәмгә ташлануы зур батырлык үрнәге. Моны кабатларга кайбер ир-атлар да сәләтле түгел. “Сыйныфташлары белән аралашканнан соң, Данилның бик гадел малай булганлыгы аңлашылды. Бу гаиләдәге тәрбиядән килә. Аның бу батырлыгы әти-әнисе биргән тәрбия нәтиҗәсе”, - дип ассызыклап, Александр Бастрыкин Россия Тикшерү комитеты исеменнән батыр йөрәкле малай тәрбияләгән өчен Айдар һәм Наталья Садыйковларга зур рәхмәт җиткерде.

ТР Президенты Рөстәм Миңнеханов үз чыгышында искәртеп узганча, тиешле тәрбия булмаган булса, мондый батырлык үрнәге дә булмас иде. Республика башлыгы малайның якыннарының кайгысын уртаклашып, республика,Чаллы муниципаль берәмлеге җитәкчелегенең аларга һәрвакыт ярдәмгә әзер булуын белдерде.

Чарада катнашучылар Данилны бер минут тынлык белән искә алдылар.