Казанда Иннополисның җентекле мастер-планы тәкъдим ителде

Бүген Татарстан җитәкчелегенә Казанда Иннополис яңа шәһәре төзүнең RSP Architects Сингапур компаниясе әзерләгән җентекле мастер-планы тәкъдим ителде. Мастер-планны ТР Президенты Рөстәм Миңнехановка, республика Хөкүмәте вәкилләре, министрлыклар, төзелеш һәм проектлау оешмалары җитәкчеләренә Хөкүмәт Йортында RSP Architects компаниясе директоры Лиу Тай Кер тәкъдим итте.

Татарстан Президенты Рөстәм Миңнеханов очрашуны ачканда агымдагы елның апрель ахырында Иннополисның мастер-планы проекты тәкъдим ителүен искәртте. Шул вакыттан алып, 3 ай дәвамында республиканың профильле министрлыклары, проектлау оешмалары белгечләре белән бергә RSP Architects Сингапур компаниясе тарафыннан мастер планны детальләштерү һәм эшләп бетерү буенча зур эш башкарылган. 9 июньдә яңа шәһәрнең нигезенә символик “флешка” салынды.

“Бүген Иннополис – федераль дәрәҗәдәге проект, - дип ассызыклады ТР Президенты. – Бу проект нигезендә ОЭЗ булдыруга гариза теркәлгән, һәм потенциаль резидентлар белән эш алып барыла. Шуңа күрә безгә мастер-планны әзерләү буенча эшне тулысынча тәмамларга кирәк”.

Шулай ук Рөстәм Миңнеханов IT-үзәкнең – Иннополисның беренче чиратының төп өлешен төзү проектын әзерләү кирәклеген искәртте.

RSP Architects директоры Лиу Тай Кер үзенең презентациясендә нәтиҗәле хезмәттәшлек өчен Татарстан коллегаларына рәхмәтен белдерде. Аның сүзләренчә, Иннополис халкы 155 мең кеше, аларның 60 меңе - IT-индустрия компанияләре хезмәткәрләре булырга тиеш. Шәһәрнең мәйданы 20 кв. километр тәшкил итәчәк. Лиу Тай Кер Иннополисның коммерцияле, торак һәм иҗтимагый объектларын төзү һәм планлаштыру детальләре, яңа шәһәр инфраструктурасының үзенчәлекләре турында сөйләде.

Татарстан Президенты тәкъдим ителгән мастер-планны тулаем алганда хуплады. “Без бик күп кызыклы нәрсәләр күрдек, - дип белдерде Татарстан башлыгы. – Мастер-планны эшкә җибәрергә кирәк дип уйлыйм, бары тик берничә момент тагын бер кат сөйләшеп алуны таләп итә”.