ТР Президенты “Аммоний” ААҖ комплексы төзелеше барышы белән танышты

Бүген ТР Президенты Рөстәм Миңнеханов Менделеевски муниципаль районында булды, аммиак, метанол һәм гранулалы карбамид җитештерү буенча комплекс төзелеше барышы белән танышты.
Искәртеп үтәбез, узган елның октябрендә яңа завод нигезенә беренче таш салынган иде. Май башында төзелеш мәйданында эш башланды. Нигездә комплекс аммиак белән карбомид чыгарачак. Әмма әлеге проектның уникальлеге аның метанол чыгаруга да исәпләгән булуында.
Проект Тышкы икътисад банкы һәм берничә чит ил компаниясе консорциумы - Япониянең Mitsubishi Heavy Industries (подрядчы), Sojitz Corporation (проект координаторы) компанияләре, шулай ук Кытайның CNCEC/CC-7 катнашында гамәлгә куела. Консорциумның тагын бер катнашучысы Дзержински шәһәренең “Карбамид һәм органик синтез продуктлары фәни-тикшеренү һәм проект институты” ААҖ.
Хәзерге вакытта комплекс төзелеше башлангыч стадиядә – корпуслар һәм җитештерү корылмалары нигезләре, шулай ук җир асты коммуникацияләре салына. Булачак заводның территориясе 40 га тәшкил итә.
Татарстан Президентын чит ил белгечләренең көнкүреш һәм торак шартлары белән таныштырдылар. Алар өчен төзелеш мәйданыннан ерак түгел офис бинасы һәм торак шәһәрчек төзелгән.
3 айда төзелеш мәйданында 680 миллион сумлык эш башкарылган. Агымдагы елның 31 октябренә кадәр нигез салу һәм җир асты коммуникацияләрен төзеп бетерү планлаштырыла.
ТР Президенты төзелеш мәйдаында булганнан соң “Аммоний” ААҖ проектын гамәлгә кую мәсьәләләренә багышлаган киңәшмә үткәрде.
2014 ел ахырында заводны төзеп бетерү планлаштырыла.