Казан Кремлендә Лондондагы Олимпиадада җиңүчеләргә ТР Дәүләт бүләкләре тапшырдылар

Бүген Казан Кремлендә Татарстан Республикасы Президенты Рөстәм Миңнеханов Лондондагы Олимпиадада җиңүчеләргә ТР Дәүләт бүләкләре тапшырды.
Бүләкләү тантанасында ТР Дәүләт Советы Рәисе, республиканың Волейбол федерациясе башлыгы Фәрит Мөхәммәтшин да катнашты.
“Без бүген мөһим вакыйга, ягъни Лондонда Олимпия уеннары төгәлләнү уңаеннан җыелдык. Нәтиҗә һәм җиңү бар, - дип башлады чыгышын Татарстан Президенты. – Без җиңүгә зур тырышлык куеп ирешүегезне аңлыйбыз”.
“Сез безнең илне, республиканы, үзегезне танытасыз. Сез безнең горурлык”, - диде Рөстәм Миңнеханов спортчыларга һәм тренерларга мөрәҗәгать итеп. “Россия Президентының һәрберегезнең хезмәтен югары бәяләве куандыра”, - дип билгеләп үтте ул һәм республика мөмкин булганча җиңүчеләрне һәм Уеннар призерларын бүләкләргә тырышачак дип өстәде. Рөстәм Миңнеханов республика җитәкчелеге исеменнән спортчыларга һәм җиңүгә өлеш кертүчеләргә рәхмәт сүзләре белдерде. “Без барыбыз да сезнең уңышларга куандык, уңышсызлыклар өчен кайгырдык, ә бүген иң яхшыларны хөрмәтлибез”, - дип ассызыклады ул.
“Без, әлбәттә, зур җиңүләр көттек, әмма һәркемнең алтын медаль аласы килә. Безгә оят түгел”, - диде ТР Президенты. Якын арада Татарстанда эре спорт чаралары – Универсиада, спортны су төрләре буенча дөнья чемпионаты, футбол буенча дөнья чемпионаты көтелә, республикада спортны үстерүгә җитди игътибар бирелә. Рөстәм Миңнеханов фикеренә караганда, нәкъ менә Олимпия җиңүләре спортчыларны яшьләр өчен үрнәк итеп куя.
Искәртеп узабыз, Лондондагы Олимпиадада Россия җыелма командасы рәсми булмаган гомумкоманда зачетында дүртенче урынны алды. Россиялеләр 82 медаль алды – 24 алтын, 26 көмеш һәм 32 бронза. Татарстанны тәкъдим итүче 22 спортчының 10 сы медаль белән кайтты, шул исәптә 7се – алтын.
Бүген Лондондагы Уеннар чемпионнары, волейбол буенча Олимпия җыелма командасы “Зенит-Казан” клубы уенчылары Николай Апаликов һәм Александр Волков, шулай ук Волейбол буенча ир-атларның Россия җыелма командасы һәм Казанның “Зенит” командасы баш тренеры Владимир Алекно “Татарстан Республикасы алдындагы хезмәтләре өчен” ордены белән бүләкләнде.
Уеннар чемпионы, Россиянең синхрон йөзү буенча олимпия җыелма командасы әгъзасы Эльвира Хәсәнова, 2012 елда Лондонда Олимпиадада көмеш медаль иясе, РФ фехтование буенча Олимпия җыелма командасы әгъзасы Камилә Гафурҗанова, Олимпиадада бронза медаль иясе, тхэквондо буенча Олимпия җыелма командасы әгъзасы Алексей Денисенко, Уеннарда бронза медаль иясе, стендка ату буенча Россия җыелма командасы әгъзасы Василий Мосин, синхрон йөзү буенча РФ җыелма командасы баш тренеры Татьяна Покровская һәм Камилә Гафурҗанованың тренеры, Россия Фехтование федерациясе вице-президенты Илдар Шәймарданов ТР “Фидакарь хезмәте өчен” медальләре белән бүләкләнделәр.
Василий Мосинның тренеры, стендка ату буенча ТР җыелма командасының баш тренеры Сергей Деминга “ТР Атказанган физик культура хезмәткәре” исеме бирелде. Алексей Денисенконың тренеры Станислав Ханга Татарстан Президенты рәхмәте белдерелде.
Эльвира Хәсәнова республика җитәкчелегенә спортчыларны әзерләүдә ярдәм итүләре һәм Татарстанда спортны үстерүдә көч куюлары өчен рәхмәт белдерде. Ул шулай ук Татарстан спортчылары тагын да күбрәк Олимпия медальләрен яулавын һәм республикада балалар спорты үсеш алуын теләде.
Василий Мосин үз чиратында, “Президент атказанган спорт мастеры булган республикада башка нәтиҗәләр була алмый” дип билгеләп үтте. Дәүләт бүләкләре тапшыру – һәр залда утыручыга һәм җиңүгә өлеш керткән кешеләргә югары бәя. Очрашу ахырында Рөстәм Миңнехановка көмеш сувенир медаль тапшырдылар.