Рөстәм Миңнеханов “Әлмәтнефть” нефть-газ чыгару идарәсенең 60 еллыгын бәйрәм итүдә катнашты

Бүген “Татнефть” ААҖ нең әйдәп баручы һәм алдынгы структура бүлекләре коллективының берсе 60 еллык юбилеен бәйрәм итә. Бәйрәм тантанасында ТР Президенты Рөстәм Миңнеханов, ТР Дәүләт Советы Рәисе Фәрит Мөхәммәтшин, “Татнефть” ААҖ генераль директоры Шәфәгать Тәхаутдинов, Әлмәт районы башлыгы Мәҗит Салихов катнаша.

“Әлмәтнефть” коллективы 60 еллык тарихында 600 млн. тоннадан артык нефть чыгарган, бу республикада табылган нефтьнең биштән бер өлешен тәшкил итә. Бу Советлар Союзында 1971 елда Ленин ордены белән бүләкләнгән бердәнбер нефть чыгаручы предприятие.

Еллар дәвамында коллектив кадрлар данына ия булган. “Татнефть”нең бөтен җитәкчеләре дә диярлек “Әлмәтнефть” мәктәбен узган. Нефть-газ чыгару идарәсе алдынгы технологияләрне сынау мәйданчыгы булды һәм булып тора. Нәкъ менә биредә производство комплексы автоматлаштырылган һәм телемеханизацияләнгән.

“Әлмәт нефтьчеләре һәрвакыт көчле корпоратив традицияләре, көчле производство мәктәбе һәм эшләү осталыгы белән аерылып торды. Нефть тармагы республика иминлеге нигезе булды һәм булып кала”, - дип мөрәҗәгать итте Татарстан Президенты идарә ветераннарына һәм хезмәткәрләренә һәм Хөкүмәт бүләкләре тапшырды.

“Татнефть” ААҖ генераль директоры “Әлмәтнефть” нефть-газ чыгару идарәсе җитәкчесе Миргазиян Таҗиевка югары дәрәҗәдәге бүләк һәм “Юность” сәламәтләндерү лагеры белән “Татнефть” ААҖ спорт комплексына спорт кирәк-яраклары алу өчен 10 млн. сумлык сертификат тапшырды.

Әлмәт районы башлыгы Мәҗит Салихов республиканың нефть башкаласын төзекләндерүдә ярдәм күрсәтүләре өчен “Әлмәтнефть” нефть-газ чыгару идарәсе коллективына рәхмәт белдерде. Күп еллар дәвамында предприятие шәһәрдә ипотека буенча торак төзелеше кураторы булып тора. Әлмәт нефтьчеләре катнашында Мәдәният һәм ял паркы, Казан соборы һ.б. объектлар төзелде.

Предприятие ветераннарына аерым рәхмәт сүзләре белдерелде. Идарәдә 523 хезмәт династиясе бар, гомуми хезмәт стажы 50 мең ел тәшкил итә.