Рөстәм Миңнеханов: "Күпбалалы гаиләләргә биреләсе җир кишәрлекләре башка максатларда кулланырга тиеш түгел"

Бүгенге көндә Татарстанда өч һәм аннан күбрәк балалары булган гаиләләрдән җир кишәрлекләре белән тәэмин итүгә кагылышлы 18 меңгә якын гариза алынган. Гаризаларның 11 проценты электрон формада - ТР Дәүләт һәм муниципаль хезмәтләре порталы аша юлланган. Узган бер айда 1385 гариза алынган. Бу хакта бүген ТР Хөкүмәт йортында узган республика киңәшмәсендә җир һәм мөлкәт мөнәсәбәтләре министры Азат Хамаев җиткерде.

Ул күпбалалы гаиләләргә каралган җирләрне кадастр хисабына кую буенча Җир һәм мөлкәт мөнәсәбәтләре министрлыгының август дәвамында районнар белән актив эшләвен искәртте. ТР Президенты кушуы буенча бу эш агымдагы елның 1 сентябренә тәмамланырга тиеш иде. Бүгенге көндә республикада барлыгы 14786 җир участогы кадастр хисабына куелган, ягъни тәкъдим итәргә әзер (Казан һәм Чаллыдан тыш). Шуның 5246 сы кадастр хисабына узган айда алынган.

Азат Хамаев бүгенгә 43 районда күпбалалы гаиләләргә 6822 җир участогы тәкъдим ителүен хәбәр итте. Аларның гомуми мәйданы 820 гектарга якын. 30 районда тәкъдим ителгән җир участокларының күләме 50 проценттан артык, ә менә Әлмәт, Түбән Кама, Ютазы районнарында ул 30 проценттан кимрәк.

Министр сүзләренә караганда, Казанда яшәүче күпбалалы 3771 гаиләнең бүгенге көндә 3677 сеннән гариза алынган. Аларга биреләчәк җир кишәрлекләре территориясе инде билгеле - Каймар һәм Сокуры авыллары янында булачак. Беренчесе буенча барлык мәсьәләр инде хәл ителгән, бу җир кишәрлекләрен әлеге максатларга тапшыру буенча инвесторлар белән эш бара. Чаллыда җир кишәрлекләрен 3 сентябрьдән тәкъдим итә башлаячаклар.

Президент Рөстәм Миңнеханов җир кишәрлекләре белән тәэмин итү эшенең, аеруча шәһәр җирендә, катлаулы мәсьәлә булуын искәртеп, аны хәл итүне озакка сузмаска кушты.