Татарстан Президенты Арча районында булды

Бүген Татарстан Президенты Рөстәм Миңнеханов Арчада капиталь ремонт үткәрелгән мәктәптә булды. Республика башлыгы белән Арча районы башлыгы Алмас Нәзиров сыйныфларны, спорт залны һәм актлар залын карады.

Арчаның 2 нче номерлы мәктәбе директоры Гөлнара Гарипова кунакларга сөйләгәнчә, бу уку йорты 1972 елда яки 40 ел элек төзелгән булган. Бу чорда мәктәптә капиталь ремонт бөтенләй үткәрелмәгән, бары тик агымдагы ремонт эшләре генә башкарылган. Мәктәпне капиталь ремонт программасы буенча яңартуга республика бюджетыннан 12 млн. 800 мең сум акча бүлеп бирелгән. Программада каралмаган эшләр өчен район бюджеты акча биргән. Гомумән алганда, мәктәптә капиталь ремонт кысаларында түбә яңартылган, электр чыбыклары тулысынча яңартылган, суүткәргеч, канализация торбалары, тәрәзәләр алмаштырылган. Моннан тыш, җылылык белән тәэмин итү мәсьәләсе хәл ителгән һәм бина тышланган.

Быел Татарстанда капиталь ремонт программасы буенча 170 кә якын мәктәп реставрацияләнгән, дип билгеләп үтте республика башлыгы. Агымдагы ел программасына кергән барлык мәктәпләрдә дә капиталь ремонт эшләре төгәлләнгән, төзекләндерү эшләре генә калган. Рөстәм Миңнеханов фикеренә караганда, мәктәпләрдә капиталь ремонт иртәрәк башланырга тиеш иде, әмма мөмкинлек булмаган. Татарстан Президенты сөйләвенчә, ул бу мәктәпне Арчада үзе эшләгән вакыттан бирле белә, ул вакытта да әлеге мәктәп капиталь ремонттан соң кебек матур булмаган.

Рөстәм Миңнеханов Арчага сәфәре кысаларында Төбәк-Чокырча авылында күп функцияле үзәк ачуда катнашты. Агымдагы елның апрелендә төзелә башлаган мәдәни-спорт комплексының гомуми мәйданы 450 кв. метрдан артык. Күп функцияле үзәк 2012 елда ТР да мәдәни һәм күп функцияле үзәкләр төзү программасы кысаларында торгызылган.

Арча муниципаль районының яшьләр эшләре, спорт һәм туристлык бүлеге җитәкчесе Зиннур Сәгыйтов сүзләренә караганда,7,5 мең кеше яши торган микрорайон өчен мондый үзәк ачылу мөһим вакыйга, чөнки биредә андый үзәкләр булмаган.

Мәдәни-спорт үзәгендә волейбол, өстәл теннисы буенча секцияләр, олылар өчен йога буенча түләүле секцияләр оештыру планлаштырыла. Биредә вокал, хореография дәресләре, шулай ук мәдәни-спорт чаралары үткәреләчәк. Бу объект төзелешенә 10 млн. сум бүлеп бирелгән.

Һәр ел саен кимендә бер клуб төзеләчәк, дип ышандырды республика башлыгы. Шулай ук ФАП, мәктәп, су, торакларны капиталь ремонтлау, авылларга юл үткәрүгә кагылышлы программалар дәвам ителәчәк дип тә өстәде ул.