Белем көнендә Рөстәм Миңнеханов Казанда 27нче номерлы татар гимназиясендә булды

Бүген капиталь ремонттан соң ачылган 27 нче гимназиядә беренче кыңгырау чыңы яңгырады. Тантаналы линейкада Татарстан Президенты Рөстәм Миңнеханов, Казан мэры Илсур Метшин, шулай ук ТР мәгариф һәм фән министры Альберт Гыйльметдинов, ТР төзелеш, архитектура һәм торак-коммуналь хуҗалык министры Ирек Фәйзуллин һ.б. катнашты.

Казан мэры Илсур Метшин линейкага җыелучыларны яңа уку елы башлану белән котлады. “27 нче гимназиядә татар халык традицияләренә, тарихына һәм туган телне өйрәнүгә зур игътибар бирелә, - диде Илсур Метшин. - Бу эшегезне зур тырышлык белән дәвам итү өчен уку йортында барлык шартлар да тудырылган”. Шәһәр мэре яңартылган мәктәптә уку мөмкинлеге биргән өчен Татарстан Президентына укучылар һәм ата-аналар исеменнән рәхмәт белдерде.

Рөстәм Миңнеханов үз чиратында, быел республиканың 165 мәктәбендә капиталь ремонт үткәрелде, дип искәртте. “Бу мәктәп яныннан узып киткән саен әллә ничек булып китә иде”, - дип белдерде республика башлыгы. Хәзер капиталь ремонттан соң мәктәп яңарып китте.

ТР Президенты шулай ук гимназиядә татар телендә белем бирүләренә игътибарны юнәлтте. “Без һәрвакыт халкыбыз, традицияләребез турында уйларга тиеш һәм мондый мәктәпләр республикада булырга тиеш”. Ул укучыларга укуларында уңышлар теләде һәм гимназия директоры Люция Хөснетдиновага интерактив комплекска сертификат тапшырды.

Гимназия алдындагы мәйданчыкта беренче кыңгырау чыңы яңгыраганнан соң Рөстәм Миңнеханов белән Илсур Метшинга мәктәп буенча экскурсия үткәрделәр.

Бу вакытта актлар залында Универсиада дәресе бара иде, анда гимназия укучылары алдында көрәш буенча Татарстан чемпионы Раил Нургалиев чыгыш ясады. Ул үз каршыңа бурыч куйган очракта җиңүгә ирешергә мөмкин дип сөйләде. Раил Нургалиев сүзләренә караганда, Татарстан башкаласында спорт белән шөгыльләнү өчен барлык шартлар да тудырылган. “2013 елда узачак Универсиада истә калачак, чөнки Казанга төрле илләрдән спортчылар киләчәк”, - дип ышана спортчы.

Рөстәм Миңнеханов укучыларны спорт белән шөгыльләнергә һәм Универсиадаларда катнашырга чакырды. “Волонтерлар һәм аларның ярдәмчеләре булу өчен мөмкинлекләр бар”, - дип өстәде республика башлыгы.