Илдар Халиков: “Hyundai Universe Luxury автобусларын бүгеннән үк сынап карап, аларның ышанычлы транспорт булачагына инана алуыбызга сөенәм”

Hyundai Universe Luxury автобусларының Казанга кайтарылган беренче партиясе бүген башкалабыз урамнарыннан элдерә. Аларны Универсиада авылы территориясендә Татарстан Республикасының транспорт компанияләренә тантаналы төстә тапшыру чарасында ТР Премьер-министры Илдар Халиков, Hyundai Motor Company вице-рәисе Чой Хан Янг, ТР Яшьләр эшләре, спорт һәм туризм министры урынбасары Сергей Иванов, “XXVII Бөтендөнья җәйге Универсиада-2013” Башкарма дирекциясе генераль директоры Владимир Леонов, Универсиада авылы мэры Фәрит Абдулганиев һәм башка рәсми затлар катнашты.

Универсиадада транспорт белән тулысынча тәэмин итү өчен 525 автобус кирәк (шул исәптән, 344 шәһәрара, 143 шәһәр классындагы һәм 38 микроавтобус). Аларның беренче 25е бүген “Буревестник” ҖЧҖ нә, “Яшел Үзән ПАТП” ААҖ, “Түбән Кама ПАТП-1” ААҖ карамагына күчте.

“Универсиада якынайганнан якыная бара һәм без төрле чаралар белән аның эчтәлеген көннән-көн баета барабыз”, - дип башлады сәламләү чыгышын Илдар Халиков. Премьер-министр Универсиада өчен объектларның күпчелек өлешенең бүген инде әзер һәм Казан халкы, югары уку йортларында белем алучы студентлар өчен аларның ишекләре ачык булуын билгеләп узды. “Күпчелек юл объектлары төзелеше дә быел тәмамланырга тора. “Казан” халыкара аэропортының яңа терминалы һәм яңа очып күтәрелү-төшү полосасы төзелеше ахырына якынлаша. 2013 нче елгы Универсиаданың сыйфатлы һәм оешкан төстә үтүе өчен җаваплы булган барлык вәкилләр актив рәвештә әзерләнә”, - дип ассызыклый Илдар Халиков.

“Транспорт белән тәэминат – Универсиада өчен мөһим мәсьәләләрнең берсе. Мин, Универсиадага әле шактый вакыт кала, Hyundai Motor Company продукциясен ала башлавыбызга һәм аны сынап карый алуыбызга һәм әлеге техниканың Универсиада көннәрендә ышанычлы транспорт булачагына инана алуыбызга сөенәм”, - дип, Илдар Халиков коллегаларына оператив хезмәт өчен, шулай ук килешүләрне рәсмиләштерүдә катнашкан затларга рәхмәтен җиткерде.

Hyundai Motor Company вице-рәисе Чой Хан Янг исә, тантаналы чарада катнашучыларны сәламләп: “Без эшчәнлегебездә төп игътибарны югары сыйфатка һәм клиентларның канәгать булуына юнәлтәбез”, - дип билгеләп үте.

Тантаналы чара рәсми затларның яңа автобуста Универсиада авылы тирәли әйләнеп кайтуы белән тәмамланды.

Югарыда телгә алынган 525 автобустан тыш, Универсиаданың автомобиль паркын шулай ук 929 данә Hyundai Sonata һәм Hyundai Solaris җиңел автомобильләре, бушлай бирелүче 122 Hyundai H-1 микроавтобусы, туристик класслы 344 Hyundai Universe автобуслары тулыландырачак. 2014 нче елда Сочида узачак XXII Олимпия һәм XI Паралимпия уеннарына әзерлек графигы нигезендә, агымдагы елның октябреннән 2013 нче елның мартына кадәр Сочи шәһәрендә төрле чаралар үткәреләчәк, Универсиада өчен алынучы автобуслар анда да сынау рәвешендә кулланылачак. Моннан тыш, яңа автобуслар Казанда нәфис гимнастика буенча Россия чемпионатында, самбо буенча илкүләм ярышларда да хезмәт күрсәтәчәк.