ТР һәм РФ Икътисади үсеш министрлыгы тышкы икътисад өлкәсендәге мөнәсәбәтләр турында килешү имзалады

Бүген Мәскәүдә Россия Федерациясе Икътисади үсеш министрлыгы белән Татарстан Республикасы Хөкүмәте арасында икътисад өлкәсендә мөнәсәбәтләр турында килешү имзаланды. Документны РФ Икътисади үсеш министрлыгы җитәкчесе Андрей Белоусов һәм Татарстан Республикасы Президенты Рөстәм Миңнеханов имзалады.

Бүген килешү РФ Икътисади үсеш министрлыгының “Чит ил дәүләтләрендә Россия Федерациясе сәүдә вәкиллегенең яңа йөзен формалаштыру”га багышланган коллегия кысаларында имзаланды. Килешү кысаларында чит илдә бизнес алып бару чаралары планын эшләү, шулай ук Икътисади үсеш министрлыгының сөйләшүләр алып баруда катнашуы карала.

Бүген шундый килешүләр РФнең башка төбәкләре, шулай ук Россиянең эре компанияләре, шул исәптә “КАМАЗ” ААҖ белән дә имзаланды. Килешү төбәкләр, компанияләр һәм чит илләр арасында сәүдә-икътисади элемтәләрне үстерү мөмкинлеге бирәчәк.

Россия икътисади үсеш министры Андрей Белоусов белдергәнчә, әлеге килешү кысаларында киләчәктә чит илдә этәрүгә мохтаҗ булган проектлар исемлеген билгеләүче өстәмә докуметнлар имзаланачак. “Татарстан, Калуга өлкәсе, Ульяновски өлкәсе кебек төбәкләрнең чит ил инвестицияләрен җәлеп итүдә төгәл ихтыяҗлары бар. Ә моның өчен чит илдә үз имиджыны булдырырга һәм проектлар пакеты тәкъдим итү кирәк”, - дип билгеләп үтте министр. – Бу юнәлештә төбәкләргә ярдәм итәчәкбез”.