Рөстәм Миңнеханов: Татарстанны сәнәгать предприятиеләре продукциясен Индонезия базарына чыгару мөмкинлеге кызыксындыра

Бүген Татарстан Республикасы Президенты Рөстәм Миңнеханов Индонезиянең Россия Федерациясендәге Гадәттән тыш һәм Тулы вәкаләтле илчесе Джаухари Оратмангун белән очрашты.

Казан Кремлендә узган очрашуда Татарстан Республикасы ягыннан ТР мәдәният министры Айрат Сибагатуллин, ТР яшьләр эшләре, спорт һәм туристлык министры Рафис Борһанов һ.б. катнашты.

Рөстәм Миңнеханов илче әфәндегә Татарстанга игътибарлы булуы, Россия Федерациясе, шул исәптә төбәкләр белән элемтәләрне ныгыту эшләре алып баруы өчен рәхмәт белдерде.

Татарстанны Индонезия белән сәүдә-икътисад мәсьәләләре, Индонезия базарына сәнәгать предприятиеләре продукцияләрен чыгару буенча хезмәттәшлек итү кызыксындыра, дип ассызыклады ул. Моннан тыш, Индонезиядә һәм Татарстан Республикасында да туристлык өлкәсен үстерү зарур, дип билгеләп үтте ТР Президенты. Рөстәм Миңнеханов сүзләренә караганда, бүген Татарстан – туристлар агымы арту күзәтелә торган төбәк.

“Без шулай ук Индонезиянең милләтара һәм конфессияара мөнәсәбәтләр өлкәсендәге тәҗрибәсе белән дә кызыксынабыз, - диде Татарстан башлыгы. – Индонезиядә 200 дән артык этник төркем вәкилләре дус-тату яши. Бу мәсьәлә конфессияара, милли һәм мәдәни бәхәсләр нигезендә килеп чыккан конфликтлар булып торган вакытта бигрәк тә актуаль булып тора”.

Рөстәм Миңнеханов Индонезиянең Россия Федерациясендәге Гадәттән тыш һәм Тулы вәкаләтле илчесе Джаухари Оратмангунга бүген Казанда Халыклар дуслыгы йорты мәйданчыгында узачак Индонезия музыкасы концертын оештыруы өчен рәхмәт белдерде. ТР Президенты концерт татарстанлылар игътибарын Индонезия мәдәниятенә җәлеп итәчәгенә ышана.

Рөстәм Миңнеханов үзара элемтәләрне ныгыту өчен Татарстан белән Индонезия арасында бизнес-делегацияләр белән алмашуны җайга салу мөһим дип белдерде.

Джаухари Оратмангун үз чиратында, Индонезия ягы Татарстан эшлекле даирәләре вәкилләрен һәм шулай ук ТР Президентын Индонезиягә визит ясауга әзерләү өчен бар көчен куячак дип ышандырды. “Безгә халык мәнфәгатьләрен кайгырту өчен хезмәттәшлек итү юнәлешләрен арттыру зарур”, - диде ул.

Очрашуда ТР мәдәният министры Айрат Сибагатуллин Индонезиядә Татарстан Республикасы сәнгать осталары концертын оештыру мәсьәләсен карарга тәкъдим итте.

ТР яшьләр эшләре, спорт һәм туристлык министры Рафис Борһанов Татарстанның Индонезиянең туристлык компанияләре белән элемтәләрне җайга салуларын белдерде. 2013 елның апрелендә Индонезия туроператорларын җәлеп итеп семинар оештыру ниятләнә.