Татарстан Президенты Финляндия бизнес-делегациясе белән очрашты

Бүген Татарстан Президенты Рөстәм Миңнеханов Ауропа эшләре буенча һәм Финляндия тышкы сәүдә министры Александер Стубб җитәкчелегендәге Финляндиянең эшлекле даирә делегациясе белән очрашуда икътисади хезмәттәшлекне үстерү, Татарстанда фин компанияләренең яңа проектларын гамәлгә кую, туры авиаочыш ачу һ.б. мәсьәләләр буенча фикер алыштылар.

Очрашуда ТР Премьер-министры Илдар Халиков катнашты.

Рөстәм Миңнеханов Александер Стуббка фин бизнесменнары делегациясе визитын оештырган өчен рәхмәт белдерде. “Финляндия һәм Россия Федерациясе мөнәсәбәтләре кысаларындагы безнең мөнәсәбәтләр Татарстанның һәм сезнең илнең киләчәк үсешенә этәргеч булачагына ышанам”, - дип мөрәҗәгать итте ТР Президенты министрга.

Рөстәм Миңнеханов зур канәгатьлек белән Татарстан белән Финляндиянең тышкы сәүдә үсә, дип билгеләп үтте. Узган ел үсеш 17 процент тәшкил итсә, быел аннан да күбрәк. Республика Президенты фикеренә караганда, Татарстан белән Финляндия үзара хезмәттәшлек итү өчен зур потенциалга ия һәм аннан файдаланырга кирәк.

Республика җитәкчелеге ТР да фин сәнәгать компанияләрен күрергә теләр иде, дип белдерде Татарстан башлыгы. Рөстәм Миңнеханов сүзләренә караганда, фин бизнесы Казандагы “Иннополис” IT-шәһәрендәге эшләр белән кызыксынырга тиеш.

Татарстан белән Финляндиянең туристлык өлкәсендә хезмәттәшлек итүдә үсеш перспективалары зур, дип билгеләп үтте республика Президенты. Рөстәм Миңнеханов фин ягына Казанда виза үзәге ачулары өчен рәхмәт белдерде, әмма киләчәктә туристлык агымы артуга турыдан-туры авиаочыш булмау комачаулавын билгеләп үтте. “Татарстан фин туристларына кызыклы булыр иде дип уйлыйм, - дип мөрәҗәгать республика башлыгы Александер Стуббка. – Турыдан-туры авиарейслар оештыру кирәк дип уйлыйм. Без бу эшне башкаруда мөмкин кадәр тырышачакбыз, ә сез федераль җитәкчелек белән очрашуда бу мәсьәләгә игътибар юнәлтегез”.

Рөстәм Миңнеханов Финляндия җитәкчелегенә анда яшәүче татарларга игътибарлы булулары өчен рәхмәт белдерде. “Татарлар безнең мөнәсәбәтләр үсешенә аерым өлеш кертергә тиеш дип уйлыйм”, - дип белдерде ТР Президенты.

Ул шулай ук әйдәп баручы фин хоккейчылары “АК Барс” командасы уңышына өлеш кертә, Финляндия җыелма командасы футболчылары “Рубин”да уйный, дип искәртте. “Фин җыелма командасы Казанда Универсиадада сынатмас”, - дип ассызыклады Рөстәм Миңнеханов.

Ауропа эшләре буенча һәм Финляндия тышкы сәүдә министры Александер Стубб Казанда беренче тапкыр булса да, республика турында күп ишетүе турында сөйләде.

Александер Стубб сүзләренә караганда, фин делегациясе составына төзелеш, энергетика, авыр сәнәгать өлкәләрен тәкъдим итүче 30 га якын бизнесмен керә. “Финнар өчен Россиядә, бигрәк тә Татарстанда бизнес ачу җиңел”, - дип саный министр.

Очрашу ахырында Татарстан Президенты фин делегациясенә Казанда уңышлар теләде. “Хакимият вәкилләре буларак безнең бурыч – бизнес-структураларны очраштыру һәм безнең элемтәләрне үстерүгә ярдәм итү”, - дип мөрәҗәгать республика башлыгы Александер Стуббка.

Бүген фин делегациясе Татарстан-фин бизнес-форумында катнаша, IT-паркны карый. Аларга Республика проектлары һәм ТРның инвестицион потенциалы тәкъдим ителәчәк.