Татарстан Президенты авыл хуҗалыгы техникасын җитештерүче әйдәп баручы компания вәкилләре белән очрашты

Бүген Татарстан Президенты Рөстәм Миңнеханов авыл хуҗалыгы техникасы җитештерүче John Deere әйдәп баручы компаниясе вәкилләре белән очрашты. ТР Хөкүмәте йортында узган очрашуда John Deere Agriculturals Holdings, Inc. филиалы җитәкчесе Джозеф Барретт, John Deere компаниясенең Россиядәге генераль директоры Дерек Будро, ТР Президентының икътисади мәсьәләләр буенча ярдәмчесе Айрат Хәйруллин “Алабуга” МИЗ генераль директоры Тимур Шаһивәлиев катнашты.

Американың John Deere компаниясе продукциясе сыйфаты һәм технология дәрәҗәсе буенча бөтен дөньяга танылган, дип билгеләп үтте ТР Президенты. “Без АКШта булганда, компаниянең бер заводын карадык һәм технологик үсешен күреп сокландык, - диде Рөстәм Миңнеханов. - Татарстанда кулланыла торган Jonh Deere техникасы ышанычлы һәм югары җитештерүчәнлеккә ия булуын күрсәтә”.

Заманча авыл хуҗалыгы техникасы авыл хезмәтен тамырдан үзгәртте, дип билгеләп үтте ТР башлыгы. Республика җитәкчелеге авыл хуҗалыгында әйдәп баручы технологияләрне кертергә ярдәм итә. Рөстәм Миңнеханов сүзләренә караганда, соңгы елларда Татарстанда яңа технологияләр буенча эшләнгән 500 заманча чәчү комплексы һәм 2 мең туфрак эшкәртү коралы барлыкка килгән.

John Deere Agriculturals Holdings, Inc. филиалы җитәкчесе Джозеф Барретт Рөстәм Миңнехановка компаниягә биргән игътибары һәм Америка заводына визиты өчен рәхмәт белдерде. Джозеф Барретт Татарстан Президентына компаниянең эшчәнлеге һәм John Deere авыл хуҗалыгы техникасы модель рәтләре турында сөйләде.

Очрашуда яклар авыл хуҗалыгы техникасы җитештерүче дөньяга танылган компания белән Татарстанның хезмәттәшлек итү перспективалары буенча фикер алышты.