Рөстәм Миңнеханов Россиядә Корея Халык-Демократик Республикасы илчесе Ким Ен Дже белән очрашты

Бүген ТР Президенты Рөстәм Миңнеханов РФдә Корея Халык-Демократик Республикасының Гадәттән тыш һәм Тулы вәкаләтле илчесе Ким Ен Дже белән очрашты.

Очрашу Казан Кремлендә үтте, анда Татарстан ягыннан ТР сәнәгать һәм сәүдә министрының беренче урынбасары Руслан Кәбиров, ТР Президенты ярдәмчесе Радик Гыйматдинов һәм башка рәсми затлар катнашты.

Яклар алдагы хезмәттәшлек һәм үзара файдалы мөнәсәбәтләрне үстерү мәсьәләләре турында сөйләштеләр.

Рөстәм Миңнеханов Ким Ен Джены сәламләп, аерым алганда, аңа сәфәре өчен, рәхмәтен белдерде. ТР Президенты ТРда халыкара дәрҗәдәге бик күп чаралар узуын, дипломатик вәкиллекләр ачылуын, бик күп илләрнең виза үзәкләре эшләвен билгеләде.

“Без хезмәттәшлек яклы, һәм безнең багланышлар безгә тагын да активрак эшләргә мөмкинлек бирәчәк”, - диде Рөстәм Миңнеханов.

Яклар истәлекле сувенирлар белән алмаштылар. ТР Президенты РФдә Корея Халык-Демократик Республикасының Гадәттән тыш һәм Тулы вәкаләтле илчесе Ким Ен Джега ТР турында китап тапшырды. Ким Ен Дже Рөстәм Миңнехановка чәчәк ата торган сакура төшерелгән, төрле ташлардан эшләнгән картина бүләк итте.