Рөстәм Миңнеханов Стратегик инициативалар агентлыгының күзәтчелек советы утырышында катнашты

Бүген Татарстан Республикасы Президенты Рөстәм Миңнеханов Россия Президенты Владимир Путин үткәргән Стратегик инициативалар агентлыгының күзәтчелек советы утырышында кайбер проектларны тәкъдим итте. Ул, аерым алганда, медицина фәннәре үзәге булдыру һәм медицина кадрлары әзерләү өчен медицина тренажер-стимуляторлар ("Эйдос-медицина”) куллану турында сүз алып барды.

Татарстанның тагын бер инициативасы – Әлмәттә эшче һөнәре буенча белгечләр әзерләүче уку үзәге булдыру.

Рөстәм Миңнеханов утырыш ахырында ММЧ вәкилләре сорауларына җавап биреп, бүген Стратегик инициативалар агентлыгында профессиональ команда эшли дип белдерде. Аның сүзләренә караганда, Татарстан Стратегик инициативалар агентлыгы белгечләре белән хезмәттәшлек итү нәтиҗәсендә күпсанлы яңа мәгълүмат һәм идеяләр ала, аннары алар республикада чынга ашырыла.

“Мисал өчен, бүген ике проект буенча фикер алыштык, - диде Рөстәм Миңнеханов. – Бер проект ресурс уку үзәге ачу белән бәйле, чөнки бүген белгечләр әзерләү төп мәсьәлә булып тора.”

Икенче проект медицина хезмәткәрләре әзерләү өчен медицина тренажер-стимуляторлар куллану белән бәйле. Дөньяда бу технологияләр актив файдаланыла инде, бездә исә медицина җиһазларының кыйммәт булуы аны киң кулланырга мөмкинлек бирми, дип билгеләп үтте ТР Президенты.

“Без Стратегик инициативалар агентлыгы күзәтчелек советы әгъзалары игътибарына башка тәкъдим һәм идеяләрне дә куябыз, - диде Рөстәм Миңнеханов. – Мисал өчен, “юл картасы” проекты. Бүген бу инвестицион климатны яхшырту, милекне һәм яңа бизнесны теркәү процедурасын камилләштерү өчен кирәкле адым. Гомумән алганда, бу федераль һәм төбәк, шулай ук муниципаль структуралардан да тора. Бу мәсьәләдә консолидацияләнгән эш кенә тиешле нәтиҗә бирәчәк”.