Рөстәм Миңнеханов Әлмәттә “Гаилә табибы” офисында булды

ТР Президенты Рөстәм Миңнеханов бүген Әлмәткә эш сәфәре барышында гомумпрактика табибларының “Гаилә табибы” (“Семейный доктор”) офисында булды. Офис Әлмәт шәһәренең 60 еллык юбилее һәм Татарстанда нефть ятмалары үзләштерелә башлауга 70 ел тулу уңаеннан кала халкына бүләк булды. Ул әле күптән түгел генә нефтьчеләр башкаласының халык тыгызлыгы зур булган “Яшьлек” микрорайонында ишекләрен ачкан иде. Бүген биредә яшәүчеләр саны 4000 нән артык, микрорайон киңәюен дәвам итә. Әлеге социаль әһәмияттәге проект шәһәр халкын үтемле амбулатор ярдәм белән тәэмин итә.

Гомумпрактика табиблары офисы “Татнефть” ААҖ, Әлмәт муниципаль районы һәм ТР Сәламәтлек саклау министрлыгы хезмәттәшлегендә туган проект. “Татнефть” һәм ТР Дәүләт торак фонды акчаларына күпкатлы йортларның берсендә офис өчен беренче каттагы өч фатир сатып алынган. Аның гомуми мәйданы 184 кв метр. Аны төзекләндерү эшләрен муниципалитет финанслаган. ТР Сәламәтлек саклау министрлыгы кирәкле җиһазлар белән тәэмин иткән. “Гаилә табибы” офисы Әлмәт районы үзәк хастаханәсенең структур бүлекчәсе санала. Биредә халыкка медицина ярдәме мәҗбүри медицина иминияте программасы кысаларында күрсәтелә. Пациентлар махсус тикшерелү узу өчен биредә сырхауханәгә юлламалар да ала.

Гомумпрактика табиблары офисы иң заманча таләпләргә җавап бирә. Биредә коляскалы инвалидлар өчен дә уңайлыклар каралган.