Илдар Халиков республиканың Әгерҗе районында булды

Бүген ТР Премьер-министры Илдар Халиков республиканың Әгерҗе районында булды. Сәфәре вакытында И.Халиков Бөек ватан сугышы ветераннары өчен, 15 фатирлы йорттагы төзелеш эшләре барышы белән танышты. Өметов урамындагы йортта төзелеш ахырына якынлаша. Гыйнварда ветераннарга яңа фатир ачкычларын тапшыру планлаштырыла.

Шулай ук ТР Премьер-министры соцаль иппотека һәм гражданнарны авария хәлендәге йорттан күчерү программалары буенча төзелә торган ике йорттагы эшләрнең барышы белән танышты. Хөкүмәт Рәисе төзелеш эшләре вакытында туган мәсьәләләр белән танышты һәм җитәкчеләр белән аларны чишү юллары турында сөйләште.

Илдар Халиков булачак ял итү зонасы - “Чикләвеклек” (“Орешник”) территориясендә булды. “Наратлык, саф һава... Бу шәһәр халкы өчен искиткеч ял итү урыны булачак”, - дип билгеләде ул, район башкарма комитеты җитәкчесе Валерий Макаровның фикерен хуплап. Монда концерт, спорт урыннары, балалар мәйданчыклары, ролик конькиларда һәм велосипедларда йөрү өчен, асфальтлы юллар, сәүдә урыннары булачак.

ТР Премьер-министры шулай ук “Ак Барс-Әгерҗе” агрофирмасының 2,6 мең баш савым көтүлеге мегафермасының төзелеш мәйданчыгында булды.

Комплексның беренче корпусы инде әзер. Монда Австралиядән 1200 тана урнаштырганнар. Аларны бары 6 терлекче карый. Мегаферманың икенче корпусы декабрь ахырында сафка басачак. Монда тагын Австралиядән 870 тананы урнаштырачаклар.