Рөстәм Миңнеханов: “Универсиада уздырганда иң мөһиме – киң күңеллелек, бу мәсьәләдә волонтерларга таянабыз”

Ел азагында “Казан 2013” Башкарма дирекциясе традицион төстә Россиянең саллы волонтерлар командасы эшчәнлегенә йомгак ясый. Шул уңайдан бүген Казанның “Пирамида” мәдәни-күңел ачу комплексында “Ел волонтеры” тантанасында, агымдагы елда иң яхшы эш нәтиҗәләре күрсәткән илнең 50 әйдәп баручы университетыннан һәм 30 субъектыннан волонтерлар делегацияләре билгеләп үтелде. Тантана РФ Спорт министры Виталий Мутконың видеосәламләвеннән башланды. Иң актив, булдыклы волонтерларны бүләкләү тантанасын Татарстан Президенты Рөстәм Миңнеханов ачып җибәрде.

“Барыбыз да көткән 2013 нче елгы Универсиадага 204 көн кала бара. Универсиадага әзерлек кысаларында без барлык кирәкле биналарны сафка бастырабыз, транспорт объектларын төзибез, инфраструктураны камилләштерәбез. Әмма алардан да бигрәк мондый чаралар вакытында киң күңеллелекне күрсәтү мөһим. Сездән башка моңа ирешеп булмый. Бу мәсьәләдә сезгә таянабыз, бөтен өметебез сездә”, - дип мөрәҗәгать итте Рөстәм Миңнеханов волонтерларга. Ул билгеләп үткәнчә, Универсиада волонтерлык хәрәкәтенең киң колач җәюенә этәргеч булды. Моңарчы бездә бу мәсьәләдә профессионаллык юк иде. “Төрле зур чаралардан соң сезнең хезмәтегезгә карата күпсанлы уңай бәяләмәләр ишетәбез һәм бу күңелгә бик хуш килә. Сезнең эш тәҗрибәсе ил өчен бик кызыклы һәм файдалы булачак”, - дип белдерде ТР Президенты һәм аларга энтузиазм белән эшләгәннәре өчен рәхмәтен җиткерде.

Рөстәм Миңнеханов бүген Универсиада-2013 илчеләре сафына баскан танылган спортчы, “Рубин” футбол командасы капитаны Роман Шароновка, илчелекне раслаучы ышаныч грамотасын тапшырды.

“Рекрутер” номинациясендә җиңүчеләрне “Казан 2013” Башкарма дирекциясе генераль директоры Владимир Леонов һәм Казан Башкарма комитеты җитәкчесенең социаль мәсьәләләр буенча урынбасары Ләйлә Фазлыева тәбрикләде. “Көндәлек эшемдә мин көн саен волонтерлыкка килүче яшьләргә сокланам. Тәҗрибәле волонтерлар рекрутер сыйфатында, волонтер булырга теләгән яшьләр белән скайп, интернет аша һәм күзгә-күз очрашып әңгәмә кора”, - дип, ул аларга актив эшләрендә уңышлар теләде.

Волонтерлар шулай ук “Спорт волонтеры”, “Тим-лидер”, “Команда 2013” номинацияләрендә хөрмәтләнде. Аларны котлауда ТР югары уку йортлары ректорлары советы рәисе – КФУ ректоры Илшат Гафуров, “Казан 2013” аппараты җитәкчесе – генераль директор киңәшчесе Лариса Сулима, ТР Яшьләр эшләре, спорт һәм туризм министры урынбасары Хәлил Шәйхетдинов һәм башкалар катнашты.

“Ел волонтеры 2012” Гран-приена барлыгы 12 кеше дәгъва кылган. Иң зур бүләк хуҗасын сайлаганда, жюри әгъзалары төрле чараларда волонтерлыкка багышланган сәгатьләр санын гына түгел, ә ел дәвамында волонтерның шәхси эшендә югары күрсәткечләргә ирешүен һәм уңай бәяләмәләргә лаек булуын да исәпкә алган. Шулай итеп, “Ел волонтеры” Гран-прие Казан дәүләт архитектура-төзелеш университеты студенты, 537 эш сәгате җыйган 18 яшьлек Алмаз Әскәровка тапшырылды.

Елның волонтерлык программасы йомгакларына күз салсак, төрле дәрәҗәдәге чараларда волонтерлар барлыгы 64 мең сәгать эшләгән. Волонтерлар кунакларны каршыалу һәм озату, аккредитация эшләре, делегацияләрне озатып йөрү, тукландыру һәм урнаштыруны оештыру кебек мәсьәләләр өчен җаваплы.